اردوغان: عائله قاورامینی قوروماغا داوام ائده‌جییک
"آنالاریمیزی، حیات یولداشلاریمیزی، قیزلاریمیزی، باجیلاریمیزی، اؤلکه‌میزده‌کی و دونیاداکی بوتون قادینلاری سئوگیله، سایغییلا سالاملاییرام"
تورکیه پرزیدنتی رجب طیب اردوغان ۸ مارس دونیا قادینلار گونو موناسیبتی ایله قادینلاری تبریک ائتدی. اردوغان، تبریک مئساژیندا: "سئوگیلری، امکلری و فداکارلیقلاری ایله اینسانلیغین اومودو اولان بوتون قادینلاریمیزی ۸ مارس بئینلخالق قادینلار گونو موناسیبتی ایله تبریک ائدیره‌م" دئدی.
جمهورباشقانی مئساژیندا بو ایفاده‌لره یئر وئردی:
"عائله و جمعیتین تمل دیرگی اولان قادینلارین ساییسینین تحصیل‌دن صنعته، اقتصاد‌دان سیاسته بوتون ساحه‌لرده داها چوخ اولمالیدیرلار، بونون اهمیتی بؤیوک‌دور.
اؤلکه‌میزی ایر‌لی آپارماق، اینکیشاف ائتمیش سویه‌یه داشیماق و هدفلریمیزه چاتماق اوچون قادینییلا، کیشیسی ایله بوتؤو بیر میللت اولاراق چگین-چگینه گله‌جه‌یه گئده‌جییک.
تاریخیمیز بویو حیاتین هر ساحه‌سین‌ده اؤن سیرالاردا یئر آلان، بو گون ده موباریزه‌لری و موفقیتلریله نومونه اولان بوتون قادینلاریمیزلا غرور دویورام.
آیری-سئچکی‌لیک، حاق غصبی و زوراکی‌لیق باش‌دا اولماقلا عائله، تحصیل، ایش و جمعیت حیاتین‌دا قادینلاریمیزین قارشی قارشییا قالدیغی مسئله‌لرین حله قوووشدورولماسی اوچون بیر چوخ حقوقی اصلاحاتلار حیاتا گئچیریریک. بیر جینایت اولاراق گؤردویوم قادینا قارشی هر جور فیزیکی و روحی شدتی، آیری-سئچکی‌لیگی همیشه و یئنه ده ان سرت شکیل‌ده قیناییرام. قادینلاریمیزین زوراکیلیغا معروض قالمادیقلاری بیر محیط یاراتماق اوچون آپاردیغیمیز موباریزه‌نی دایم و حساس‌لیقلا داوام ائتدیرجییک.
آچیقلادیغیمیز اینسان حاقلاری فعالیت پلانین‌دا دا قادینا قارشی شدتله موباریزه‌نی گوجله‌ندیره‌جک آددیملارا یئر وئرمیشیک.
عائله‌چی‌لیک تمللریمیزی داغیتماغا یؤنه‌لیک هر جور جهد و حرکتلر قارشی‌سین‌دا دورماغا، قادین و کیشی بوتؤولوک‌ده عائله قاورامینی قوروماغا داوام ائدجییک.
۸ مارس دونیا قادینلار گونونوزو بیر داها تبریک ائدیر، آنالاریمیزی، حیات یولداشلاریمیزی، قیزلاریمیزی، باجیلاریمیزی، اؤلکه‌میزده‌کی و دونیاداکی بوتون قادینلاری سئوگیله، سایغییلا سالاملاییرام".
ایلگیلی‌لی خبرلر
آوریل آییندا ایستانبول هاوا لیمانینا گلن یولچولارین سایی 20 میلیونو اوتوب
بو باره‌ده تورکیه-نین نقلیات و آلت یاپی ناظیرلیگیندن معلومات وئریلیب.
