مصطفی شئنتوپ: "ائرمنیستان قلوبال بیر پروبلئم دیر"

تورکیه بؤیوک میللت مجلیسی‌نین صدری مصطفی شئنتوپ ائرمنیستان-ین آرتیق قلوبال بیر پروبلئمه چئوریلدیگینی بیلدیریب.

مصطفی شئنتوپ توییتر حسابیندا ائتدیگی پایلاشمادا دئییب کی، ائرمنیستان مسکو-دا الده اولونان اینسانی آتشکس راضیلاشماسینی کوبود شکیلده پوزا‌راق سیویل اهالینی هدفه آلماقدا داوام ائدیر. بو هوجوم‌لار، سیویل اها‌لی‌نین هدفه آلینماسی، سؤزون اصل معناسیندا، ساواش جینایت‌لری‌دیر. ائرمنیستان آرتیق قلوبال بیر پروبلئمه چئوریلیب.

قئید ائدک کی، ائرمنیستان و آذربایجان روسیانین پایتاختی مسکو-دا کئچیریلن گؤروش‌لرده 10 اوکتبر 2020-جی ایل تاریخینده یئرلی ساعاتلا 12:00-دان قوه‌ده اولا‌جاق شکیلده داغلیق قاراباغ-‌داکی جنازه‌لرین و اسیرلرین موبادیله‌سینی نظرده توتان اینسانی مقصدلی آتشکس قبول ائتمیشدی.

ائرمنیستان اوردوسونون آتشکس قراری‌نین اوزریندن 24 ساعت کئچمه‌دن آذربایجانین گنجه شهرینه راکت‌لرله هوجومو نتیجه‌سینده 9 سیویل وطنداش هلاک اولوب، 34 نفر ایسه یارالانیب.