فخرالدین آلتون:" تورکیه-ده کرونا ویروس اپیدمیاسی یوخدور"

جمهور باشقانلیغی مطبوعات خیدمتی‌نین صدری فخرالدین آلتون"تورکیه-‌ده یئنی کرونا ویروس اپیدمیاسی‌نین آشکارلاندیغینا" دایر ادعا‌لارین حقیقتی عکس ائتدیرمه دیگینی بیلدیریب.

مطبوعات خیدمتیندن یاییلان آچیقلامادا چین خالق جمهوریتینده اورتایا چیخان کووید-19 (یئنی نوع کرونا ویروس) اپیدمیاسی ایله علاقه‌دار تورکیه جمهورییتی دؤولتی‌نین باشدا ساغلیق ناظیرلیگی اولماقلا موافیق قوروم و تشکیلات‌لاری ایله لازیم گلن بوتون تدبیرلرین گؤرولدوگو وورغولانیب.

اپیدمیانین اؤلکه سرحدلری داخیلینده یولوخماسی‌نین قارشی‌سی‌نین آلینماسی اوچون واجیب اولان فعالیت‌لر و تدبیرلرین حساس شکیلده آپاریلدیگینی بیلدیریلن آچیقلامادا قئید اولونوب کی، الده ائدیلن ان گونجل معلومات‌لارا گؤره اؤلکه‌میزده هر هانسی یئنی‌ کرونا ویروس یولوخما حالی قئیده آلینمامیش‌دیر. موضوع ایله باغلی بیر سیرا سوسیال شبکه سایت‌لاریندا یئر آلان تورکیه-‌ده یئنی کرونا ویروس اپیدمیاسی یولوخماسی‌نین آشکارلاندیغینا دایر ادعا‌لار حقیقتی عکس ائتدیرمیر. مئدیا قورولوش‌لاریمیزین، مئدیا منسوب‌لاریمیزین و بوتون وطنداش‌لاریمیزین ساغلیق ناظیرلیگیمیز باشدا اولماقلا رسمی قایناق‌لاری دقتده ساخلاما‌لاری، بون‌دان باشقا موضوع ایله علاقه‌لی یاییلان آچیقلاما‌لارا یاخود ایره‌لی سورولن ادعا‌لارا اعتبار ائتمه‌مه‌لری اهمیت داشیییر.