اردوغان: آلدیغیمیز دستک یالنیز نصیحت
"بیر دامجی نفتی بیر دامجی قاندان داها قیمتلی قبول ائدن ذهنیتین گؤزو سوریهده و دونیانین هر یئرینده اؤز چیخاریندان باشقا بیر شئی گؤرمور"
![اردوغان: آلدیغیمیز دستک یالنیز نصیحت](http://cdn.trt.net.tr/images/xlarge/rectangle/3036/dc0f/b6da/5dbbef5c22fcb.jpg?time=1718835755)
پرزیدنت رجب طیب اردوغان، سوریهده اولوشدورولان گوونلی بؤلگهلرین بو گون اؤلکهدهکی ان دینج و یاشانابیلیر یئرلر اولدوغونو دیله گتیردی.
اردوغان، دونن ایستانبولدا تشکیل ائدیلهن ۶.جی تورک طب دونیاسی قورولتاییندا دانیشماسیندا، باریش بولاغی عملیاتییلا سوریهلیلرین گئری قاییداجاقلاری یئنی ساحهلر قازاندیردیقلارینی ایفاده ائتدی.
سوریهلی سیغینماچیلار قونوسوندا بیرلشمیش میللتلره یئنی بیر چاغری ائدهجکلرینی بیلدیرن پرزیدنت،
"بیرلشمیش میللتلر تشکیلاتینین باش کاتیبی آنتونیو گوترش قوناغیم اولاجاق. اؤزونه دئیهجهیهم کی بیر اولوسلارآراسی باغیشچی توپلانتیسی چاغریسینی سیز ائدین. ائتدینیز ائتدینیز. ائتمهدیینیز تقدیرده بو چاغرینی من ائدجهیهم. اولدو اولدو. اولمادی، تل ابیض ایله راس العین آراسیندا لازیم اولسا بیر سیغینماچیلار شهرینی و یا شهرلرینی بیز قوراجاییق" ایفادهلرینی ایشلتدی.
اردوغان، ایللردیر میلیونلارجا سیغینماچینی تورپاقلاریمیزدا ساخلاماق اوچون بو ائو صاحبلیگینی ائتدیک. اولوسلارآراسی توپلومدان آلدیغیمیز دستک تأسف کی، یالنیز نصیحت. بیر دامجی نفتی بیر دامجی قاندان داها قیمتلی قبول ائدن ذهنیتین گؤزو سوریهده و دونیانین هر یئرینده اؤز چیخاریندان باشقا بیر شئی گؤرمور. بیز اطرافیمیزا باخدیغیمیزدا یالنیز اینسان، جان، حیات گؤروروک. دیگرلری ایله ان بؤیوک فرقیمیز بودور" دئدی.
اردوغان، سون ۸ ایلدیر سوریهلی سیغینماچیلار اوچون سرحدلرینه تیکانلی تئل هؤرگو چکمکدن باشقا هئچ بیر ایش ائتمهیهنلرین سیغینماچیلارین وطن حسرتینی بیتیرهجک چابالارا دا مانع اولدوقلارینی وورغولایاراق،
"کیمین نه دئدیگینه و ائتدیگینه باخمادان سرحدلریمیز ایچینده و دیشیندا خیدمت وئرمهیی، مظلوملارین و ضرر چکمیش اوشاقلارین اومود قاپیسی اولماغی داوام ائتدیرجییک. بئلهجه یالنیز اؤز مسئولیتلریمیزی یئرینه یئتیرمکله کیفایتلهنمهییب، عینی زاماندا بوتون اینسانلیغین اونورونو دا قورتارمیش اولاجاغیمیزا اینانیرام" دئیه دانیشدی.