اردوغان: عملیاتدان گئری آددیم آتمایاجاییق
" بیزه ساغدان، سولدان حاضردا تهدیدلر گلیر، بو گئدیشی دوردورون دئیه"
جمهورباشقانی رجب طیب اردوغان، سوریهده فرات چایینین دوغوسوندا بؤلوجو ترور هؤرگوتلری یپگ-پید/پکاکایا قارشی ائدیلن باریش بولاغی عملیاتیندان گئری آددیم آتمایاجاقلارینی سؤیلهدی.
پرزیدنت اردوغان، تورکییه بؤیوک میللت مجلیسی باشقانی مصطفی شنتوپون ائو صاحیبلیگینده، ایستانبول دولماباخچا ساراییندا گئچیریلهن "ترورلا مباریزه و بؤلگهسل باغلانتیلیلیغین گوجلندیریلمهسی" قونوسوندا ۳.جو پارلمان باشقانلارینین توپلانتیسینین آچیلیش تؤرهنینده دانیشدی.
بوراداکی چیخیشیندا تورکییه اولاراق تخمیناً ۳۵ ایلدیر ترور بلاسی ایله مباریزه ائتدیکلرینی وورغولایان اردوغان،
"موختلیف آدلار آلتیندا فعالیت گؤسترهن، اما هامیسینین دا مقصدی اؤلکهمیزین بیرلیگی، برابرلیگی، دینجلیگی و ریفاهی اولان ترور هؤرگوتلرینین سالدیریسی آلتینداییق. بو هؤرگوتلرین آرخاسیندا تورکییه ایله اوز اوزه حسابلاشماغی گؤزه آلاممایان گوجلر دایما اولموشدور، بو گون ده وار. سرحدلریمیز دیشیندا هؤرگوتلنن تعلیم و تجهیز ائدیلهن تروریستلر، تاپدیقلاری هر فورصتده وطنداشلاریمیزین راحتلیغینی، دؤولتیمیزین بوتؤولویونو تهدید ائدن قانلی ائیلملرحیاتا گئچیریر" دئدی.
تروریستلرین قاپییا دایانماسینی گؤزلهمک یئرینه، سورونو یئرینده قوروتما قراری آلدیقلارینی بیلدیرهن اردوغان،
"بو مقصدله سرحدلریمیز دیشیندا یووالانان ترور هؤرگوتلرینی ایسه اولدوقلاری یئرلرده یوخ ائتمهیی هدفلهیهن بیر مباریزه استراتژیسی گلیشدیردیک. تورکییه، قونشولارینین و دیگر بوتون اؤلکهلرین تورپاقلاری اوزریندهکی اگمن حاقلارینا و سرحدلرینه سایغیلی اما بیر شرطله؛ بو شرط ده بورالاردان اؤلکهمیزه یؤنهلیک ائیلملر، دوشمنجه فعالیتلر ائدیلمهسین" دئیه دانیشدی.
"مباریزهمیز کوردلرله دئییل، ترور هؤرگوتلریه دئین اردوغان،
"کوردلر بیزیم قارداشیمیزدیر. بیزیم بو مباریزهمیز کوردلرله دئییل، بو مباریزهمیز ترور هؤرگوتلریلهدیر. پید، یپگ، داعش، بونلارین هامیسی بیر ترور هؤرگوتودور. بوتون سندلر، هر شئی الیمیزده" دئیه دانیشدی.
تروریستلرین توپ آتیشلاری ایله بیر یاشلی سوریهلی اوشاغین اؤلدویونو خاطیرلادان اردوغان،
"بونون یانیندا یئنه ۱۰ نفره یاخین اینسانیمیز اؤلدو. بوندان اؤنجه یوزلرجهسی اؤلدورولدو. بیز بونو نه واختا قدر گؤزلهیهجییک؟ گؤزلهیهبیلمریک. تورکییه اولاراق، ۹۱۱ کیلومتر سرحدیمیز اولان و سوریه رژیمینین بئله قبول ائتمدیگی پید، یپگیه قارشی آتدیغیمیز بو آددیمی، هئچ واخت دوردورمایاجاییق. بیزه ساغدان، سولدان حاضردا تهدیدلر گلیر. "بو گئدیشی دوردورون" دئیه. آمریکا بیرلشمیش دؤولتلری پرزیدنتی دونالد ترامپا دا دئدیم، دیگرلرینه ده دئدیم. "بونو دوردوراجاقسینیز، دوردورون" دئدیک سیزه آنجاق دوردورمادینیز. ایندی بیز اؤز گؤبییمیزی اؤزوموز کسیریک. آرتیق گئری آددیم آتمایاجاییق" شکلینده دانیشدی.