اردوغان: تورکییه اؤز عملیات پلانینی ایشه سالاجاق
"پوزغونا اوغراتدیغیمیز بؤلوجو ترور هؤرگوتو یپگ/پکاکانین، متفیقیمیز اولان بیر اؤلکهنین اتکلرینین آلتینا سیغیناراق فعالیتلرینی داوام ائتدیرمهسی آیری بیر پروبلئم"
جمهورباشقانی رجب طیب اردوغان، آمریکا سؤزونده دورماییب، بیر نئچه هفته ایچینده سوریهنین قوزئیینده تورک عسگرینین فعلی اولاراق بو بؤلگهنی کنترل ائتمهیه باشلامازسا، تورکییهنین اؤز عملیات پلانینی ایشه قویماقدان باشقا چاره قالمایاجاغینی دئدی.
اردوغان ایستانبولدا، میللی ساوونما اونیورسیتهسی حرب اوخوللاری دیپلوم و سانجاق تحویل-تسلیم مراسیمینه قاتیلاراق دانیشدی.
چیخیشیندا، آمریکا ایله سوریهنین قوزئیینده گوونلی بؤلگه گؤروشمهلرینه توخونان اردوغان،
"آرتیق هئچ کس قارانلیق اللر طرفیندن بیر پروژه اولاراق اورتایا گتیریلدیگی بللی اولان داعش بهانهسی ایله هئچ کسی آلداتماغا چالیشماسین. بؤلگهدهکی بیر سیرا گوجلرین چیخار ساواشیدیر. منبحده بیزه وئریلهن سؤزلرین توتولماماسی ایله تهلوکهسیزلیگیه دایر راحاتسیزلیقلار گئتدیکجه آرتیر" دئدی.
آمریکا ایله بؤلگهده گوونلی بؤلگه دانیشدیقلارینی آنجاق تورکییه ایله آمریکا آراسیندا بعضی نقطهلرده فرقلی آنلاییشلار اولدوغونا دقت چکن اردوغان،
"پوزغونا اوغراتدیغیمیز بؤلوجو ترور هؤرگوتو یپگ/پکاکانین، متفیقیمیز اولان بیر اؤلکهنین (آمریکا) اتکلرینین آلتینا سیغیناراق فعالیتلرینی داوام ائتدیرمهسی ایسه بو گون آیری بیر پروبلئم کیمی قارشیمیزدا دورور" دئدی.
فرات چایینین دوغوسوندا بؤلوجو ترور هؤرگوتو یپگ/پکاکانین بؤلگه خالقینا ظلمونون گیزلنهممز حالا گلدیگینی ایفاده ائدن اردوغان،
"فیراتین دوغوسونداکی بوتون سرحدلریمیز بویونجا قورولاجاق گوونلی بؤلگه ایله باغلی چوخ واختیمیز و دؤزوموموز یوخدور. بیر نئچه هفته ایچینده عسگرلریمیز بؤلگهنی کنترل ائتمزسه، اؤز عملیات پلانیمیزی ایشه سالاجاییق" دئدی.