آمریکا، تورک گوجلرینه سالدیرینی قینادی
"تورک کروانینا ائدیلهن خاینجه هاوا سالدیریسینین آردیندان وطنداشلار، اینسانی کؤمک قروپلاری و بینالار آجیماسیزجا هدف آلیندی"
آمریکا بیرلشمیش دؤولتلری خاریجی ایشلر باخانلیغی سؤزچوسو مورگان اورتاگوس، سوریهنین ادلب شهریندهکی ۹ ساییلی گؤزلم نقطهسینه گئتمکده اولان تورک حربی کروانینا و ادلبدهکی وطنداشلارا قارشی هاوا سالدیریسینا باغلی سوسیال مئدیا حسابی تویتردن یازیلی بیر آچیقلاما وئردی.
اورتاگوس، آچیقلاماسیندا،
"بشار اسد رژیمی و متفیقلری ادلبده تامین ائدیلهن آتیشکسه درحال گئری دؤنمهلیدیر. (دونن) تورک کروانینا ائدیلهن خاینجه هاوا سالدیریسینین آردیندان وطنداشلار، اینسانی کؤمک قروپلاری و بینالار آجیماسیزجا هدف آلیندی. بو بیتمهسی لازیم اولان شدتی قیناییریق" ایفادهسینی ایشلتدی.
ادلبده، ۹ نؤمرهلی گؤزلم نقطهسینه اینتیقال ائتمکده اولان تورک حربی کروانینا قارشی روسیا دستکلی بشار اسد رژیمی طرفیندن هاوا سالدیریسی تشکیل ائدیلمیش؛ ۳ وطنداش حیاتینی ایتیرمیش، ۱۲ وطنداش یارالانمیشدی.
میللی ساونما باخانلیغیندان وئریلهن آچیقلامادا، بو ایفادهلره یئر وئریلمیشدی:
"آنلاشمالارا ضد حیاتا گئچیریلهن بو عملیاتلار نتیجهسینده، انتقال یوللارینین کسیلمه تهلوکهسیله قارشی قارشییا قالان ۹ نؤمرهلی گؤزلم نقطهسینین تهلوکهسیزلیگینی تامین ائتمک، یوللاری آچیق ساخلاماق و بؤلگهدهکی سیویل، سوچسوز اینسانلارین جان ایتکیسینی اؤنلهیهرک طرفلر آراسینداکی گرگینلیگی آزالتماق مقصدیله ۱۹ آگوستدا ۰۵.۳۰دا اؤنجهدن روسیا فدراسیونو طرفینه معلومات وئریلهرک بؤلگهیه بیر گوج انتقالی باشلادیلمیشدیر. سؤز قونوسو انتقال سیراسیندا کروانیمیزا ۰۸.۵۵ده هاوا سالدیریسی تشکیل ائدیلمیش، سالدیریدا بؤلگهدهکی ۳ وطنداش اؤلموش، ۱۲ وطنداش یارالانمیشدیر".
میللی ساوونما باخانلیغی طرفیندن سالدیری قینانیرکن لازیم اولان تدبیرلرین سرعتله آلینماسی ایستنمیشدی.