اردوغان و پوتین بیرگه مطبوعات کونفرانسی کئچیریب
اردوغان و سون 10 گونده 2نجی دفعه گؤروشدوگو روس همکاری ولادیمیر پوتین، سوریه نین ایدلیب بؤلگه‌سینده سیلاح‌لاردان تمیزلنمیش بؤلگه یارادیلماسیندا راضیلاشدی
ایدلیبده اینسانی درام، تورکیه‌نین چوخلو تلاش‌لاری ایله اؤنلندی.
تورکیه جمهور باشقانی رجب طیب اردوغان و سون 10 گونده 2نجی دفعه گؤروشدوگو روس همکاری ولادیمیر پوتین، سوریه نین ایدلیب بؤلگه‌سینده سیلاح‌لاردان تمیزلنمیش بؤلگه یارادیلماسیندا راضیلاشدی.
ایکی لیدر، سوچی ده، تک بتک و هیات‌لر آراسی گؤروشمه‌لرین آردین‌دان بیرگه مطبوعات کونفرانسی کئچیریب.
مطبوعات کونفرانسیندا ایلک سؤز آلان ائو صاحبی پوتین، قوناق پرزیدنت اردوغان ایله، تیجارت باشدا اولماقلا ایکیطرف‌لی علاقه‌لری موذاکیره ائتدیک‌لرینی دئییب.
تیجارتده میللی پول ایستیفاده‌سی وورغوسو ائدن پوتین، بیرگه انرژی پروژه‌لری‌نین داوام ائدجگینی بیلدیریب.
مدنیت و توریزم باش‌لیق‌لارینی دا موذاکیره ائتدیک‌لرینی ایفاده ائدن روس لیدر، اساس موذاکیره ایسه ایدلیبین یاراتدیغینی و بو مسئله‌ده اؤنملی راضی‌لیق‌لار الده ائتدیک‌لرینی دئییب.
سوریه‌دکی روس پایگاهلارینا سالدیری تهلوکه‌سین‌دن ناراحات اولدوق‌لارینی بیل‌دیرن پوتین،
موخالیف قروپ‌لارین، اؤزلری ایله آغیر سیلاح‌لاری، ایدلیبده 15-20 کیلومترلیک سیلاح‌سیز منطقه یاراتماقلا چکیلمه‌سینی قرارا باغلادیق" دئدی.
اردوغان ایسه سؤزلرینه، روسیا زیارت ائتمک‌دن دویدوغو ممنونیتی ایفاده ائده‌رک باشلادیق‌دان سونرا، ایکیطرف‌لی امکداشلیغین هر ساحه‌ده، بیرگه سیاسی ایراده اساسیندا ایرلیلدیگینی وورغولاییب.
پوتین ایله سوریه مسئله‌سینده فیکیر موبادیله‌سی آپاردیق‌لارینی قئید ائدن پرزیدنت،
ایدلیبده 15 اوکتوبردان اعتباراً، سیلاح‌لاردان تمیزلنمیش، امنیتلی منطقه یارادیلا‌راق، موخالیف‌لرین ده، رژیم گوجلرینین ده اولدوق‌لاری ساحه‌لرده قالما‌لاری باره‌ده راضیلاشدیق" دئدی.
سیلاحسیزلاشدیریلمیش بؤلگه نین امنیتی‌نین تورک و روس گوجلرینین کوردیناسیونلوغو ایچینده تامین اولوناجاغینی بیل‌دیرن اردوغان، بئله‌لیکله ایدلیبده بؤیوک بیر اینسانی درامین قارشی‌سینی آلدیغینا ایشاره ائتدی.
سوریه آنا یاسا کومیته‌سی‌نین ایشینی تاماملاماسی و سونرا کئچیریله‌جک سئچیم‌لرده سوریه خالقی‌نین اؤز سئچیمینی اورتایا قویماسی آرزوسوندا اولان اردوغان،
ترریست قروپ‌لار یالنیز ایدلیبده گؤسترمیر. ان بؤیوک تهدید، فیرات چایی‌نین شرقینده فعالیت گؤسترن ( بؤلوچو ترور تشکیلاتی پ.ک.ک-نین سوریه قولو) پ.ی.د-دیر" وورغوسو ائتدی.
اردوغان و پوتین، 7 سپتامبردا دا، ایرانین باشکندی تهراندا، ائو صاحبی حسن روحانی ایله ایدلیب آدلی 3لو ایجلاسدا بیر آرایا گلمیشدی.
