حولوصی آکاردان ادلیب خبردارلیغی

تورکیه‌نین میللی مودافعه ناظیری حولوصی آکار سوریه-نین ادلیب بولگه سینه قارشی حربی عملیاتین اونسوز دا پروبلئم‌لی اولان بؤلگه‌نی فلاکته سوروکله‌یه‌جگی باره‌ده خبردارلیق ائتدی.

تورکیه‌نین میللی مودافعه ناظیری حولوصی آکار اؤتن گون بعضی اؤلکه‌لرین سفیرلری ایله گؤروشدوگو ضیافت‌دکی چیخیشیندا اولوسلار آراسی تهلوکه‌سیزلیک و ثابیتلیگین مهم ریسک‌لرله اوزلشدیگی بیر دؤوردن کئچدیگینی بیلدیردی.

تورکیه‌نین عینی آندا بیردن چوخ تهدیدله موباریزه آپاردیغینی وورغولایان آکار: "بیر طرف‌دن فتح الله چی ترور تشکیلاتی، بولوجو ترور تشکیلاتی پ.کا.کا/پ.ی.د/ی.پ.گ/کا.ج.کا ایله موباریزه ائدیر، بیر طرف‌دن ده 3 میلیون‌دان چوخ سوریه-لیگه ائو صاحب‌لیگی ائدیریک" دئدی.

آکار تورکیه‌-نین تکجه سوریه و عراق-دا دئییل، بوتون قونشولاری‌نین اراضی و سیاسی بوتؤو‌لوگونه حؤرمتله یاناشدیغینی وورغولایا‌راق: "آنجاق بو اؤلکه‌لردن اؤلکه‌میزه قارشی اولان تجاوزه سس‌سیز قالمادیق، بوندان سونرا دا قالمایاجاغیق" ایفاده‌سینی ایشلتدی.

میللی مودافعه ناظیری ترور تشکیلات‌لارینا قارشی کئچیریلن "فرات قالخانی" و "زیتون دالی "عملیات‌لارینی خاطیرلادا‌راق: "فرات قالخانی" عملیاتیندا 3 مین‌دن چوخ داعش تروریستینی ضررسیزلشدیردیک. تورکیه داعش ایله اوز-اوزه دؤیوشن یئگانه اؤلکه‌دیر. "زیتون دالی " عملیاتیندا ایسه 5 مین‌دن چوخ پ.کا.کا و داعش تروریستینی   ضررسیزلشدیردیک. اوغورلا حیاتا کئچیردیگیمیز ایکی عملیاتلا جنوب سرحدلریمیز بویو ترور دهلیزی‌نین عمله گلمه‌سی‌نین قارشی‌سینی آلدیق. هر ایکی عملیاتدا دا وطنداش‌لارین، موحیطین، دینی و مدنی عابده‌لرین ضرر گؤرمه‌مه‌سی اوچون هئچ بیر اؤلکه‌نین گؤسترمه‌دیگی قدر حساس‌لیق گؤستردیک" دئیه بیلدیردی.

سوریه-ده سون دؤورده باش وئرن پروسئس‌لری ده دیرلن‌دیرن حولوصی آکار پرزیدنت رجب طیب اردوغانین ایران‌داکی ایجلاسدا عاجیل اولا‌راق آتشکس الده اولونماسینا دایر مراجعتینی خاطیرلادا‌راق: "ادلیب یئنی بیر بحرانین  آستاناسیندا‌دیر. روسیا، ایران و متفیق‌لریمیزله بولگه‌یه باریش و ثابیتلیگین گتیریلمه‌سی و اینسانی فاجعه‌نین قارشی‌سی‌نین آلینماسی اوچون چوخ فعالیت گؤستریریک. بعضی اؤلکه‌لر شیمیایی سلاح‌دان ایستیفاده ائدیلدیگی تقدیرده رئاکسیا وئره‌جک‌لرینی دیله گتیریرلر. لاکین اینسان‌لارین یالنیز شیمیایی سلاح‌لارلا دئییل، عادی سلاح‌لارلا دا اؤلدورولمه‌سینه قارشی چیخمالیییق. اهمیت‌لی اولان رادیکال‌لارلا موخالیف‌لرین آییرد ائدیلمه‌سی‌دیر. بو دا واخت آپارا‌جاق بیر پروسئس‌دیر. بؤلگه‌نین بومبالانماسی یالنیز سیویل لرین ضرر گؤرمه‌لرینه و کؤچ ائتمه‌لرینه دئییل، رادیکاللیغین دا آرتماسینا سبب اولا‌جاق" شکلینده دانیشدی.