تورکیه-آمریکا ایلیشکیلرینی قورتارماق هله ده ممکون
"تورکیهنی تهدید ائتمک، ایلیشکیلره ضرر وئرمکدن باشقا هئچ بیر نتیجهیه خیدمت ائتمز"
![تورکیه-آمریکا ایلیشکیلرینی قورتارماق هله ده ممکون](http://cdn.trt.net.tr/images/xlarge/rectangle/592e/f976/af3f/5b123780861de.jpg?time=1718873357)
جمهورباشقانلیغی سؤزچوسو ابراهیم قالین، رهبرلیینین، تورکیهنین تهلوکهسیزلیک قایغیلارینی درک ائتمهسی وضعیتینده بو ایلیشکینی قورتارماق و ایرلی آپارماغین هله ده ممکون اولدوغونو بیلدیردی.
قالین، دیلی صاباح قزئتینده "تورکیه-آمریکا ایلیشکیلری" قونوسوندا یازی قلمه آلدی.
آمریکانین سون ایللرده ائتدیکلرینین، تورکیهده هم رسمی شخصلر، هم ده توپلوم یانیندا جدی اعتیماد بحرانینا سبب اولدوغونو بیلدیرهن قالین، داعش ایله موباریزه آپارماق اوچون قورولان اولوسلارآراسی کوالیسیونون عضوو تورکیهنین، تروریستلررین آداناداکی اینجیرلیک مرکزیندن وورولماسینا اجازه وئردیگینی ایفاده ائتدی.
قالین، آنجاق آمریکانین، سوریهنین رقه شهریندهکی عملیاتیندا تورک اوردوسو یئرینه مرکزی خبر آلما هؤرگوتو سیآیای طرفیندن "ترور هؤرگوتو پکاکانین سوریه قولو" کیمی تانینان ی.پ.گ ایله امکداشلیق ائتدیگینی خاطیرلاتدی.
واشینگتونون بؤلوجو ترور هؤرگوتو ایله ائتدیگی بو آنلاشمانین "گئچیجی، آل-وئر ایلیشکیسینه دایانان و تاکتیکی" اولدوغونو دئیهرک اؤزونو مدافعه ائتمهیه چالیشدیغینی قئید ائدن قالین،
"آنجاق بو پلان، گئچهن ایل ترامپ رهبرلیگی طرفیندن یئنیدن تایید اولوندو. ترامپ رهبرلیینین اؤزونو سنتکوم استراتژیسیندن اوزاقلاشدیرماغا چالیشدیغی دوغرو. بو چرچیوهده ی.پ.گلی تروریستلرین، منبجدن چکیلمهسی اوچون بیر یول خریطهسی حاضیرلاندی آنجاق ملموس بیر سیاست دییشیکلیگی اولماماسی، تورکیه-آمریکا ایلیشکیلرینی پوزماغا داوام ائدیر" گؤروشونو پایلاشدی.
قالین، عینی زاماندا ترومپ رهبرلیینین، فئتؤ طرفیندن آمریکا تورپاقلاریندا تؤرهدیلهن سوچلارلا ۱۵ ژوئیه ۲۰۱۶ دؤولت چئوریلیشی جهدینین آراشدیریلماسی و جزالاندیریلماسی مسئلهسینده آددیم آتماماسینین تورکیهده خیال قیریقلیغی یاراتدیغینا دقت چکدی.
قالین، بو شرطلر آلتیندا تورکیه جمهوریتی مقاملارینین، ترامپ رهبرلییندن گلن متعارف اولمایان تپکیلری، سوسیال مئدیادا تهدید ائدیجی بیر دیل ایلخ تورکیهده یارغیلانان بیر آمریکا وطنداشینین پروبلئملرینی حل ائتمه هدفینه یؤنلدیلمیش توتوملارینی آنلاماسینین اولدوقجا چتین اولدوغونو بیلدیرهرک، یازیسینا بئله داوام ائتدی:
"دفعهلرجه ایفاده ائدیلدیگی کیمی، اؤلکهمیزین سیاسی لیدئرینین مستقیل محکمهنین صلاحیت ساحهسینه گیرهن حقوقی پروسهیه مداخیله ائتمهسی کیمی بیر شئی سؤز قونوسو دئییل. سؤزو ائدیلن آمریکا وطنداشی اندرو برونسونون حبسه می گیرجگی، ائو حبسینده می توتولاجاغی یوخسا سربست می بوراخیلاجاغی آنجاق محکمهنین وئرجیی بیر قراردیر".
یازیسیندا "آمریکا رهبرلیینین، تورکیهنین گوونلیک قایغیلارینی آنلاماسی دوروموندا بو ایلیشکینی قورتارماق و ایرلی آپارماق هله ده ممکون اولابیلر" ایفادهسینی ایشلهدن قالین، بونلاری قید ائتدی:
"آنجاق ناتو متفیقیمیزین، سرحدلریمیزین داخیلینده و خاریجینده میلی تهلوکسیزلییمیزی تهدید ائدن آددیملارینی گؤرمزدن گلهبیلمریک. باشقان ترامپ، پرزیدنت اردوغان و تورکیه ایله یاخشی ایلیشکیلره صاحب اولماق نیتینده اولابیلر. شبههسیز، بو ایلیشکیینین قارشیلیقلی سایغی و مشترک چیخارلار اساسیندا اینکیشاف ائتمهسی حالیندا بو یاناشیم قارشیلیق تاپاجاقدیر آنجاق تورکیهنی تهدید ائتمک، ایلیشکیلره ضرر وئرمکدن باشقا هئچ بیر نتیجهیه خیدمت ائتمز".