مولود چاووش اوغلو امریکانی تنقید ائتدی

خاریجی ایشلر ناظیری مولود چاووش اوغلو امریکانین سوریه-ده ترور تشکیلاتی پ.کا.کا ایله بیرگه حرکت ائتمه‌سی‌نین جدی بیر سهو اولدوغونو سؤیله‌ییب.

چاووش اوغلو آنتالیا شهرینده ژورنالیست‌لره همین موضوع ایله باغلی وئردیگی آچیقلامادا ژوئن‌ین 4-ده واشینگتن-ا  سفر ائدجگینی خاطیرلادا‌راق دئییب:

"امریکا ایله ترور تشکیلاتی پ.کا.کا-نین سوریه قولو ی.پ.گ-نین سرحدیمیزین دیگر طرفین‌دن تمیزلنمه‌سی اوچون معین زامان‌دیر ایشلییریک. أساسا بو پروبلئمین سببی ده بیز دئیی‌لیک، متفیقیمیز امریکادیر. بیر ترور تشکیلاتینی دستکله‌دی. او ترور تشکیلاتی ایله سوریه-ده بیرگه ایشلمه‌یه اوستونلوک وئردی. چونکی ترورلا موباریزه آپاردیغینی سؤیله‌ین بیر اؤلکه‌نین بئله بیر ترور تشکیلاتی ایله امکداش‌لیق ائتمه‌سی اؤزونون سؤیله‌دیک‌لریله اوست-اوسته دوشمور. آیریجا بیزیم کیمی بیر متفیقی و اهمیت‌لی بیر اؤلکه‌نی ایتیرمه ریسکی‌نین ده اولماسی امریکا اوچون ده و بوتون متفیق‌لر اوچون ده ضعیف‌لیک‌دیر. چونکی تورکیه وعدلرینی یئرینه یئتیرن، هئچ کسه قارشی سهو آددیم آتمایان، پروبلئم‌لرین حلی اوچون جهد گؤسترن، ناتو داخیلینده ان گوج‌لو ایکینجی اردوسو اولان و بوتون قوروم‌لاردا فعال ایشله‌ین، بؤلگه‌نین ثابت‌لیگی، سوله اوچون رول اوینایان اعتبارلی بیر طرفداش‌دیر. بئله بیر طرفداشی هئچ کسین ایتیرمه‌مه‌سی لازیم‌دیر. ایتیرن‌لر ایسه اؤزونه ضرر یئتیریر، بیزه دئییل. بیز آلترناتیو‌سیز، هئچ کسه محتاج دئیی‌لیک. هئچ کسین تضییق‌لرینه ده بویون ایمریک. آرتیق بو میللت اویانیب، قارشی‌لاریندا یئنی بیر تورکیه وار. بونو هر کس قبول ائده‌جک‌دیر."