باش ناظیر بینالی ییلدیریم امریکایا سرت رئاکسیا گوستردی

تورکیه‌نین باش ناظیری بینالی ییلدیریم امریکانین تورکیه‌ده 24 ژوئن دا کئچیریله‌جک ارکن سئچکی‌لرله باغلی آچیقلاماسینا سرت رئاکسیا گؤستردی.

پایتاخت آنکارادا ژورنالیست‌لرین سوال‌لارینی جاوابلان‌دیران باش ناظیر: "اونلار (امریکا)، اول اؤز ایشلرینه باخسین‌لار. سئچکی‌لردن 1،5 ایل کئچیب، هله ده سئچکی‌لرده حیله، قانون پوزونتولاری‌نین اولماسی ایله علاقه‌دار موباحیثه بیتمه‌ییب. امریکالی لار سئچکی گؤرمک ایستییرلرسه، تورکیه‌یه گلسین‌لر، نه قدر شففاف اولوب-اولمادیغینی یئرینده گؤرسون‌لر" دئدی.

قئید ائدک کی، امریکانین خاریجی ایشلر ناظیرلیگینین سؤزچوسو هدر ناوئرت تورکیه‌ده فوق العاده وضعیت تطبیقی‌نین داوام ائتدیگینی خاطیرلادا‌راق: "ارکن سئچکی‌لرین عدالت‌لی و شفاف شکیلده کئچیریله جگی ایله باغلی ناراحات‌لیق‌لاریمیز وار" دئییب.