بیر ملتین دیریلیش حماسهسی – 15 ژوئیه
او گون بیر داها "بؤیوک ملت، بؤیوک دؤولت نئجه اولور؟" تورکیه دوستا و دوشمنه گؤستردی
![بیر ملتین دیریلیش حماسهسی – 15 ژوئیه](http://cdn.trt.net.tr/images/xlarge/rectangle/9756/e7a7/2e57/5964abe96deee.jpg?time=1719121085)
اوزون ایللر حیلهگرجهسینه تورکیه سلاحلی گوجلری (ت.س.ک) ایچریسینه سیزمیش فئتؤ منسوبلاری صلاحیتلرینی آشاراق 15 ژوئیه 2016.جی ایل تاریخینده جمعه آخشامی ساعات 21:00 سولاریندا چئوریلیش جهدینه باشلادیلار. بو گیریشیم اوزون ایللر چالیشیلمیش اورتاقلی اولوسلارآراسی بیر پروژه ایدی و هدفینده تورکیهنین مستقیللیگی، اؤلکه باشقانی رجب طیب اردوغان، تورکیه بؤیوک ملت مجلیسی و حکومت اورگانلاری وار ایدی.
چئوریلیش جهدینین مرکزی اولاراق آنکارادا اولان آکینجیلار حربی هاوا مرکزی ایدی. چئوریلیش آنکارا و ایستانبولدا عینی واختدا باشلادی. قیامچیلار اولدن حاضیرلادیقلاری پلانا اساساً ایستانبولدا بوغازایچی و فاتح سلطان محمد کؤرپولری، ایستانبول امنیت مودورلویو، آتاتورک هاوا لیمانی، ترت بینالاری کیمی استراتژیک یئرلری هدفه آلدیلار. آنکارادا ایسه دؤولت میلی تهلوکهسیزلیک قورومو، آنکارا امنیت مودورلویو، امنیت باش مودورلویو، گؤلباشی پلیس اؤزل حرکات باشقانلیغی، هاواچیلیق دایرهسی، اؤزل قوهلر کوماندانلیغی، ترت باش مودورلویو، تورکییه بؤیوک ملت مجلیسی، جمهورباشقانلیغی ایقامتگاهی و اوردو باش قرارگاهینی حربی عملیاتلا اله گئچیرمهیه چالیشدیلار. بو زامان تورکیه هاوا قوهلرینین اوچاق، تانک و ماشینلاریندان ایستیفاده ائتدیلر. اوچاق و هلیکوپترلر سحره قدر آلچاقدان اوچوشلار ائدهرک هدفلرینه بومبا آتیر، تانکلار جاده و کوچهلردن گئچهرک قارشیسینا چیخانی ازهرک ایرلیلییر، ماشینلار عسگر فورماسی گئیمیش قیامچی فئتؤچولاری داشیییردی.
ایستانبول و آنکارادا ترت بینالارینی دا باسدیلار. اؤزونو یورددا باریش شوراسی آدلاندیران ایکی قیامچی چته عضولرینین حاضیرلادیغی بیاناتی زورلا آپاریجییا اوخوتدوردو. عینی بیانات عینی واختدا اوردو باش قرارگاهینین سایتینا قویولدو. متنده تورکیه سلاحلی قوهلرینین حاکمیته ال قویدوغو، بوتون اؤلکهده کوچهیه چیخما قاداغاسی یازیلیردی. مئدیا قوروملارینا بو بیاناتی عاجل اولاراق درج ائتمک دیکته اولوندو. سونرا گؤلباشی پلیس اؤزل حرکات رهبرلیگی، تورکیه بؤیوک ملت مجلیسی، جمهورباشقانلیغی ایقامتگاهی، تورکسات، آنکارا امنیت مودورلویو بینالاری بومبالاندی.
بو ایشغالچی شبکه اؤزلرینه گؤره هر شئیی دوشونموشدو. اما اونوتدوقلاری بیر شئی وار ایدی: اللهین تقدیری و اوجا تورک ملتینین قوت و جسارتی. قرآن، اذان و بایراقلا یوغرولموش تاریخ، شعور و ایمان تورکیه خالقینین کاراکتری ایدی.
ایلک اولاراق باشباخان بینعلی ییلدیریمدان "اوردوموز ایچریسیندکی خاین بیرقروپون قالخیشماسیدیر. لاییق اولدوقلاری جزانی آلاجاقلار" شرحی گلدی. سونرا سانکی بیلال حبشینین اوخودوغونو دوشوندورن بیر لاهوتی سس ایله مینارهلردن یوکسهلن صلالار سسلندی. داها سونرا چئوریلیش جهدینین اساس هدفی، دؤولت باشقانی رجب طیب اردوغانین بیر تلویزیون کانالیندان ملته چاغیریشی گلدی: "شهرلرین میدانلارینا، هاوا لیمانلارینا گئدین. ملتیمیزدن بؤیوک بیر گوج تانیمیریق”. بو چاغیریشدان سونرا او قارانلیق چئوریلیش جهدی مغلوبیته اوغرادی، پوزولدو، بیتدی.
اردوغان خالقا “کوچهیه چیخین”، “مقاومت گؤسترین” دئیینجه ائولردن کوچهلره، کوچهلردن میدانلارا، میدانلاردان شبکهنین ایشغال ائتدیگی یئرلره اینسان سئلی آخدی. ایناملی، اینانجلی اورکلرله اوچاق، تانک، هلیکوپتر، زرهلی ماشین، مرمی و بومبالارا میدان اوخودو ملتین جنگاور اؤولادلاری. قیامچیلار سلاحسیز شکیلده کوچهیه چیخان الی یالین خالقا آتیش ائتدی، بومبا آتدی.
ایستانبول، آنکارا باشدا اولماقلا بوتون تورکیهده چئوریلیش علیهینه اعتراض و مقاومتلرده عسگر، پلیس و مولکی شخص اولماقلا 248 نفر شهید اولدو، 1537 نفر یارالاندی.
تورکیه 16 ژوئیه شنبه گونو اویاندیغی زامان چئوریلیش جهدی ائدنلرین تسلیم اولما گؤرونتولری، قهرمان اؤولادلارینین شکیللری، آکینجیلار حربی هاوا مرکزینده ساخلانیلان کوموتانلارین آزاد اولوندوقلاری خبرلرینی ائشیتمهیه باشلادی. آخشام اولمادان تورکیهنین بوتون دؤولت قوروملاری، خیابان و کوچهلری قیامچیلاردان تمیزلندی.
بیر ملتین یئنیدن دوغولما حماسهیدیر 15 ژوئیه. تورکیه خالقی دونیایا “چاناققالا کئچیلمز” دئدیرتدیگی کیمی “تورکیه بؤلونمز، ملت یئنیلمز” ده دئدیرتدی همین گون. او گون بوتون اوشاقلار بؤیودو، گنجلر یئتکینلشدی تورکیهده. او گون تورکیه بایراغی گؤی اوزو، مسجیدلردن سسلنن صلالار مارش، تکبیرلر ایسه شیفرهسی اولدو خالقین.
آنادولو بیر داها وطن اولدو شهید و غازیلری ایله. او گون بیر لیدئر اطرافیندا یاخشیلیق و عدالت اوچون توپلانما برکتی و غالیبیتی گؤردو تورکیه. او گون دوشمن مغلوب اولدو، هر کس یاشیندان آرتیق بؤیودو. او گون یئنی ایستیقلال مارشینی بیر نفرین دئییل، بیر خالقین نئجه یازدیغینا شاهید اولدو. او گون بیر بیرینه باغلاناراق وطنی، بایراغی و اذانی دایم مدافعه ائتمهیی بیر داها آنلادی تورکیه خالقی. او گون بیر داها “بؤیوک ملت، بؤیوک دؤولت نئجه اولور؟” تورکیه دوستا و دوشمنه گؤستردی. او گون تورکیه دونیایا بیر حماسه یازدی.
ایلگیلیلی خبرلر
![پکاکالی ۴ تروریست تاثیرسیز حالا گتیریلدی](http://cdn.trt.net.tr/images/medium/rectangle/0f58/61b4/d37d/5f800345c2e8d.jpg?time=1719121085)
پکاکالی ۴ تروریست تاثیرسیز حالا گتیریلدی
"تروریستلر اوچون قاچاجاق یئر یوخ، هئچ بیر یئر اونلار اوچون اعتبارلی دئییل"
![۴ تروریست تاثیرسیز حالا گتیریلدی](http://cdn.trt.net.tr/images/medium/rectangle/cb09/0bb8/be30/667528251ad6f.jpg?time=1719121085)
۴ تروریست تاثیرسیز حالا گتیریلدی
بیت الشباپ چؤلونده بؤلوجو ترور تشکیلاتی منسوبو تروریستلرله ایستی تماس تامین ائدیلدی