قادین بویوک ائلچیلر تورک قادینینی دیرلندیردی

تورکیه‌نین پایتاختی آنکارا-دا بویوک ائلچی اولان دؤرد قادین چای سفرسینده بیر آرایا گله‌رک تورک قادینی ایله باغلی فیکیرلرینی بؤلوشدولر.

اسلواکی-یانین آنکاراداکی بویوک ائلچیسی آننا تورنیچووا، پرتغال-ین آنکاراداکی بویوک ائلچیسی پاولا لال دا سیلوا و استونی-نین آنکاراداکی بویوک ائلچیسی مارین موتتوس و فینلاندیانین آنکاراداکی بویوک ائلچیسی پایوی کایرامو تورک قادین‌لارینی گوج‌لو، چالیشقان، گؤزل، باجاریق‌لی و فرق‌لی‌لیک‌لری ایله زنگین کیمی کاراکتریزه ائتدی‌لر.

اوچ قادین همکارینی ائوینده قبول ائدن فینلاندیانین آنکارا‌داکی بویوک  ائلچیسی کایرامو اؤلکه‌سی‌نین تورکیه ایله موناسیبت‌لری‌نین تاریخی‌نین 100 ایلدن چوخ اولدوغونو وورغولایا‌راق:"قادین‌لارین سیاسی حیاتدا ایشتیراکینا اهمیت وئریریک. فینلاندیا و تورکیه‌نین قادین میللت وکیل‌لری‌نین قارشی‌لیق‌لی سفرلر ائتمه‌لرینی و علاقه یاراتما‌لارینی تامین ائدیر و دستکلییریک" دئیه دانیشدی.

پرتغال-ین آنکاراداکی بویوک ائلچیسی پاولا لال دا سیلوا تورکیه و تورک قادینی ایله علاقه‌دار فیکیرلرینی بؤلوشه‌رک: "تورکیه‌یه توریست کیمی گلنده ده بورانین فرق‌لی‌لیک‌لری بیر آرایا سیغدیران بیر اؤلکه اولدوغونو دوشونموشدوم. مختلیف‌لیک هر زامان یاخشی‌دیر. توپلومون بونؤوره‌سی‌نین ساغلام و محکم اولدوغو نظره چارپیر" دئدی.

سلواکی-نین آنکارا‌داکی بویوک ائلچیسی تورنیچووا دا بو موختلیف‌لیگه دقت چکدی و: "هامی‌نین دوستلوق ایچینده یاشادیغینی گؤروروک. یولدا گئدرکن بیری مینی اتک‌لی، دیگری باش اورتولو اولان ایکی گنج قادینی قول قولا گؤره بیلرسینیز. دیگر طرف‌دن، تورکیه‌نین سلواکی سفیرلیگینده چالیشان قادین دوست‌لاریمیز دا، خاریجی ایشلر ناظیرلیگینده و دیگر ناظرلیک‌لرده تماس قوردوغوموز قادین‌لار دا سون درجه پروفسیونال و چالیشقاندیرلار" دئدی.

پرتغال-ین بویوک ائلچیسی سیلوا تورک قادین‌لاری‌نین چوخ گؤزل اولدوغونو قئید ائتدی، فینلاندیا بویوک ائلچیسی کایرامو دا تورکیه‌دکی قادین‌لارین چوخ گوج‌لو اولدوغونو ووغولادی.

استونی-نین بویوک ائلچیسی موتتوس: "ژوئن‌دن اعتباراً تورکیه‌ده‌یم، اما بو قیسا زاماندا بئله ایشلرینده اوغورلو اولان بیر چوخ قادینلا تانیش اولدوم. تورک قادینی‌نین گوج‌لو موقع‌لرده اولدوغونو گؤرمک چوخ تأثیرلی‌دیر. ایندییه قدر تانیش اولدوق‌لاریم آراسیندا موزه مودیری ده وار، رداکتور دا. آشیب-داشان انرژییه مالیک قادین‌لاردیر" دئدی.