"سنین گوجون وارسا..."

خاریجی ایشلر باخانی مولود چاووش‌اوغلو، عراق سرحدینه عسگر داشینماسی‌نین تدبیر آماجلی اولدوغونو سؤیله‌دی.

آنتالیادا قزئتچی‌لرین سوال‌لارینی جاوابلایان چاووش‌اوغلو، عسگرلرین، سرحدین عراق طرفین‌دکی ترور هؤرگوت‌لرینه قارشی حاضر گؤزله‌دیگینی ایفاده ائتدی.

چاووش‌اوغلو، عراق باشباخانی حیدر العبادینین عراق‌داکی ترور تهدیدیله مباریزه اوچون بعشیقه‌ده اولان تورک حربی وارلیغی قونوسوندا چیخیش‌لارینی سرت دیلله تنقید ائتدی.

عراقین تورپاق بوتؤو‌لوگونو و مستقیل‌لیگینی تورکیه‌دن داها گوج‌لو دستکله‌ین باشقا بیر اؤلکه اولمادیغینی ایفاده ائدن چاووش‌اوغلو؛

"عراقین گوونلیگی و ثابت‌لیگی بیزیم اؤز گوونلیگیمیز و ایستیقراریمیز قدر اؤنملی‌دیر" دئدی.

مولود چاووش‌اوغلو؛

"عراقین تورپاق بوتؤو‌لوگونو دستکله‌ین تورکیه حاقیندا، بغداد رهبرلیگی‌نین اؤز ایچین‌دکی پروبلئم‌لر یا دا بعضی اؤلکه‌لرین تحریک‌لری سببیله گلیشی‌گؤزل آچیقلاما وئرمه‌سی دوغرو دئییل" دئدی.

بعشیقه‌ده اولان تورک حربی وارلیغی قونوسوندا بغداد رهبرلیگی‌نین ائتدیگی چیخیش‌لارا تپکی گؤسترن خاریجی ایشلر باخانی؛

"سنین گوجون وارسا نیه موصولو ترور هؤرگوت‌لرینه تسلیم ائتدین؟ سن مادام بو قدر گوج‌لوسن نیه پ‌کاکا ایللردیر سنین تورپاق‌لارینی ایشغال ائدیر؟ بیر ترور هؤرگوتینه قارشی مباریزه ائده‌بیلمیرسن، ضعیفسن، اوندان سونرا دا قاباداییلیق ائتمه‌یه چالیشیرسان، بون‌لار بیزیم اوچون بوش شئی‌لر. بیز اؤز تدبیرلریمیزی آلاجاغیمیزی داها اول‌دن اعلان ائتدیک. حاضردا دا او تدبیرلریمیزی آلیریق" دئدی.