23-جو دونیا انرژی کنگره‌سی باشا چاتدی

آنادولو آژانسی‌نین قلوبال ایله‌تیشیم طرفداشی اولان 23-جو دونیا انرژی کنگره سی سونا چاتدی.

ایستانبول کنگره مرکزینده اوکتوبرین 9-دا باشلایان کنگره دونیا انرژی شوراسی‌نین صدری ماریا خوزه نادونون وظیفه‌سی‌نین  یونگ‌هون دیوید کیم-ه تحویلی مراسیمی ایله باشا چاتدی.

قلوبال انرژی سکتورونون آپاریجی اویونچولارینی بیر آرایا گتیرن و "انرژی اولمپیادی" کیمی ده تانینان کنگره-یه  تورکیه پرزیدنتی رجب طیب اردوغان، باش ناظیر بینا‌لی ییلدیریم، باش ناظیر معاوینی نومان کورتولموش، انرژی و طبیعی قایناق‌لار ناظیری برات آلبایراک، روسیا پرزیدنتی ولادیمیر پوتین، آذربایجان پرزیدنتی ایلهام علی یف، روسیا انرژی ناظیری آلکساندر نوواک، ونزوئلا دولت باشچی‌سی نيكلاس مادورو، اوپک کاتیبی محمد بارکیندو، قطر انرژی و صنایع ناظیری  محمد بن صالح الساده، الجزایر انرژی ناظیری نورالدین بوطرفه، قابون نفت ناظیری اتیان دیودون انگوبو، ونزوئلا نفت ناظیری ائولوخیو دل پینو ، مکزیک انرژی و هیدروکربن ناظیرینین معاونی آلدو فلورس کویروگا قاتیلدی‌لار.

کنگره چرچیوه‌سینده ایمضا‌لانان "تورک آخینی گاز کمری لاییحه‌سی موقاویله‌سی" ده توپلانتی‌دا ایمضالانان مهم مسئله لردن بیری ایدی.

آنلاشما روسیانین انرژی ناظیری آلکساندر نوواک و تورکیه‌نین انرژی و طبیعی قایناقلار ناظیری برات آلبایراک طرفیندن ایمضالاندی.

ناظیر آلبایراک، همچنین شیما‌لی قیبریس تورک جمهوریتی نین ایقتیصادیات و انرژی ناظیری سونات آتون ایله امکداش‌لیق آنلاشماسی ایمضالادی.

دیگر طرفدن، سعودی آرامکو 18 تورک شیرکتی ایله آیری-آیری‌لیقدا آنلاشما سندی ایمضالادی.

ایمضا‌لانان آنلاشما سند ایله تورک شیرکت‌لری‌نین سعودی آرامکونون موختلیف لاییحه‌لرینده مزایده لرده ایشتیراک ائتمه‌سی تامین اولوندو.

تورکیه‌نین انرژی و طبیعی قایناقلار ناظیری برات آلبایراک کنگره ده ایسرائیل‌ین انرژی ناظیری یووال ایستینیتز ایله ده گؤروشدو.

تورکیه-ایسرائیل موناسیبت‌لرینده نورماللاشما پروسئسی‌نین باشلادیغینی بیلدیرن ایستینیتز: "بیر نئچه ایل فاصیله‌دن سونرا تورکیه‌یه ایلک رسمی سفری ایسرائیل حکومتی آدین‌دان حیاتا کئچیردیگیم اوچون چوخ شادام. تورکیه اوزرین‌دن آوروپایا گاز نقل ائده‌جک بیر بورو خطی مسئله‌سینی ناظیر آلبایراک ایله موذاکیره ائتدیک. بو موضوع ایله باغلی ایکی حکومت آراسیندا خصوصی بیر دیالوق کانا‌لی آچماغا قرار وئردیک" دئدی.

نفت ایخراج ائدن اؤلکه‌لر تشکیلاتی (اوپک) آک دنیزی‌نین شرقین‌ده‌کی یول پلانی دا ایستانبولدا معین لشدیردی.

ایستانبول-ا گلن بیر نئچه اوپک عضوو اولان اؤلکه‌لرین رسمی‌لری 26-28 سپتامبر 2016-جی ایلده اوپک-ین الجزایرده‌کی غیری-رسمی گؤروشونده قبول ائتدیگی "اوره تیم میقدارینی دوندورما" قرارینی اوپک عضوو اولمایان روسیا ایله موذاکیره ائتدی‌لر.

کنگره ده اوپک عضوو اولمایان بعضی اؤلکه‌لرین ده اوکتوبرین 29-دا وین-ده کئچیریله‌جک اوپک گؤروشمه سینه چاغیریلماسی باره‌ده قرار وئریلدی.

سعودی عربیستان انرژی، صنایع و طبیعی قایناقلار ناظیری خالد فالح، روسیا ایله آپاردیق‌لاری انرژی امکداش‌لیق راضیلاشماسینی روسیا انرژی ناظیری آلکساندر نوواک ایله ایستانبول-دا موذاکیره ائدجگینی بیل‌دیره‌رک:"روسیانین یاپیجی رول اویناماغا داوام ائتمه‌سینی گؤزلییرم" دئدی.