رجب طیب اردوغان "الجزیره" تلویزیونونا موصاحیبه وئردی

تورکیه‌نین دؤولت باشچی‌سی رجب طیب اردوغان فتح الله چی ترور تشکیلاتی / پارالل دؤولت یاپیلانماسینین (فئتو/پ.د.ی) مقصدی‌نین یالنیز تورکیه‌ده حاکمیت قورماق اولمادیغینی، آفریقا اؤلکه‌لری باره‌ده ده پلانلاری‌نین اولدوغونو سؤیله‌دی.

اردوغان قطرین "الجزیره" تلویزیون کانالینا وئردیگی موصاحیبه‌ده فئتونون چئوریلیش تشببوسو ایله باغلی سوال‌لاری جاوابلاندیردی.

تورکیه‌ده دؤولت چئوریلیشی جهدی‌نین فئتو طرفیندن حیاتا کئچیریلدیگینی بیلدیرن اردوغان: "فئتونون مقصدی یالنیز تورکیه‌ده حاکمیت قورماق دئییل. او، آفریقا اؤلکه‌لرینه ده موداخیله ائتمه‌یه چالیشیر" دئدی.

اردوغان بو قروپون دینی جماعات اولمادیغینی، اؤلکه‌نی و اقتصادیاتی نظارت آلتینا آلماغا چالیشان ترور تشکیلاتی اولدوغونو وورغولادی و: "ظالیمه قارشی ضعیف‌لیک گؤسترمک مظلوما ائدیلمیش بیر خیانت‌دیر. چئوریلیشچی‌لره قارشی ضعیف‌لیک گؤسترمه‌جییک. اونلار ساتقین‌دیرلار. اونلارا مرحمت ائتمیه‌جییک" دئیه دانیشدی.

سوروشدورمالارین داوام ائتدیگینی، لاکین بونون اوزون موددت‌لی بیر پروسئس اولاجاغینی قئید ائدن اردوغان: "اونلارین کؤک‌لرینی قازاجاغیق. دؤولتی صیفیردان قوراجاغیق. تهلوکه‌سیزلیک قوه‌لریمیزی تمیزلیجییک. بو ایستیقامت‌دکی ایشلری دستکلییریک" دئدی.

اردوغان15 ژوئیه‌ده‌کی چئوریلیش جهدین‌دن سونرا اؤزونون اؤلکه‌نی ایستدیگی کیمی ادارئتمه قودرتینه مالیک اولدوغو ایله علاقه‌دار ادعا‌لارلا باغلی سوالا: "بون‌لاری اصلا قبول ائتمیرم. من تورک خالقی‌نین منه وئرمدیگی سلاحیتدن ایستیفاده ائتمرم. دئسپوت و دیکتاتور دئییلم. اگر خالق پرزیدنت سیستمینه کئچمک ایستیقامتینده بیر قرار آلارسا، او واخت منه وئریلن سلاحیت‌لردن ایستیفاده ائدیرم. من آنایاسانین منه وئرممیش اولدوغو بیر سلاحیتی هئچ واخت ایستیفاده ائتمه حاقینا صاحب دئییلم. بو، طیب اردوغانین کاراکتری‌دیر. بوتون دونیانین بونو بئله بیلمه‌سینی ایستییرم" شکلینده جاواب وئردی.

غربین دؤولت چئوریلیشی جهدی قارشی‌سیندا توتدوغو مؤوقعینی تنقید ائدن اردوغان:"غرب بیزه چئوریلیشه قارشی اولدوغونو گؤسترمه‌دی. سکوت‌لاری باغیشلانیلمازدیر. بیزه یالنیز "کئچمیش اولسون" دئدی‌لر. سونرا قریبه صحبت‌لر ائتدی‌لر. بیزه "بیر سیرا اینسانی ایشدن چیخاریرسینیز، عسگرلری و حاکیم‌لری حبس ائدیرسینیز" دئدی‌لر. سیزین تورکیه‌ده نه باش وئردیگینی آنلاما‌دان بیزی و اؤلکه‌ده کی سیستمی تنقید ائتمه‌یه حاقینیز یوخ‌دور. بو شخص‌لر دوروست دئییل‌لر. آمریکانین باش قرارگاه رئیسی (جوزف دانفورد) گلدی. مجلیس بینامیزی گؤستردیک. کیم بومبالادی اونو؟ فئتو عضو‌لری" دئیه بیلدیردی.

غربین تورکیه‌نی تنقید ائتمه‌یه حاقی اولمادیغینی وورغولایان اردوغان: من حدینیزی بیلین" دئییرم. عدالتلی اولون، دؤزوملو اولون. خالق طرفیندن سئچیلمیش بیر حکومته قارشی چئوریلیش جهدی باغیشلانماز. بو چئوریلیشه قارشی سس‌سیز قالان‌لار، توتالیتار سیستمی دموکراسی‌دن اوستون توتان‌لاردیر. بو پلانلاری پوزان خالقیمی آلنیندان اؤپورم". دئدی.

واشینگتن رهبرلیگی‌نین اعاده سی باره‌ده سند ایسته‌دیگینه توخونان اردوغان آمریکانین باش قرارگاه رئیسی‌‌نین تورکیه بؤیوک میللت مجلیسینده اولدوغو زامان یانیندا تورکیه سلاحلی قوه‌لری‌نین باش قرارگاه رئیسی خلوصی آکارین دا اولدوغونو خاطیرلاتدی. اردوغان: "آمریکا باش قرارگاه رئیسی بیزه گلنده سوروشدو کی:"الینیزده بو شخصین مجلیسی بومبالایان آدام اولدوغونو ثبوت ائدن بیر سند وار می؟" بیزیم باش قرارگاه رئیسیمیز دا "ثبوت منم" دئدی" ایفاده‌سینی ایشلتدی.

روسیا پرزیدنتی ولادیمیر پوتین‌نین دؤولت چئوریلیشی جهدی‌نین ارته‌سی گونو زنگ ائده‌رک شهیدلرله علاقه‌دار باش‌ساغ‌لیغی وئردیگینی و روسیانین دستکینی ایفاده ائتدیگینی بیلدیرن اردوغان چرشنبه آخشامی گونو ایش آداملاریندان‌ عبارت هئیت ایله روسیایا گئدجگینی بیلدیردی.

آوروپا اتفاقی ایله تورکیه آراسیندا قاچقی‌لار باره‌ده راضیلاشمایا توخونان اردوغان آروپا اتفاقی‌نین وئردیگی سؤزلره عمل ائتمدیگینی خاطیرلاتدی و: "قاچقین‌لارین قایتاریلماسینی نظرده توتان راضیلاشمانین قوه‌یه مینمه‌سی لازیم‌دیر. آوروپا بیرلیگی تورکیه‌دن وظیفه‌لرینی یئرینه یئتیرمه‌سینی طلب ائتمه‌سی اوچون اولجه اؤز اوزرینه دوشنی ائتمه‌لی‌دیر. آروپا اتفاقی بو آنا قدر بو مسئله‌ده بیر آددیم بئله آتماییب. اؤلکه‌میزده حاضردا 3 میلیون سوریه‌لی و عراق‌لی وار، بون‌لارین هامیسی قاچقین‌دیر. آروپا اتفاقی‌نین بئله بیر پروبلئمی یوخ‌دور" دئیه دانیشدی.