نوسایبین منطقه‌سینده 1 عسکر شهید اولدو

ماردین‌ین نوسایبین منطقه‌سینده ال دوزلتمه‌سی پاتلاییجی‌نین پارتلاماسی نتیجه‌سینده 1 عسکر شهید اولدو، 6 عسکر یارالانیب.

پارتلاییش، بؤلوچو تشکیلات پ.ک.ک عضوو تروریستلرجه ایستیفاده ائدیلن بیر بینا‌داکی آختارما اثناسیندا رئال‌لاشدی.

ترور تشکیلاتی پ.ک.ک-یا یؤنلیک "باهار تمیزلیگی" چرچیوه‌سینده دوغو و گونئی-دوغو آنادولو بؤلگه‌سینده عملیات‌لار ایسه داوام ائدیر.

عملیات‌لاردا دیاربکیرین لیجه منطقه‌سینده 6، ماردین‌ین نوسایبین منطقه‌سینده 5، شیرناک‌دا 4 تروریست اؤلدورولدو، 1 تروریست گوونلیک گوجلرینه تسلیم اولدو.

قارصین کاغیزمان منطقه چؤلونده ایجرا ائدیلن آختارما داراما فعالیت‌لری اثناسیندا دا 5 تروریست اؤلدورولدو.

شیرناک‌ین اولو دره منطقه‌سی کوره تپه بؤلگه‌سینده ایسه اوجا و چوخ دیک بیر اراضیده ائدیلن عملیات اثناسیندا نیظامی بیرلیک‌لرین یاخینلاشدیغینی فرق ائدن پ.ک.ک‌لی تروریست‌لر، تله‌سیک ماغارا‌لاری ترک ائتدی.

تروریست‌لر قاچارکن ماغارا‌لاری پارتلاییجی‌لارلا توزاکلادی.

تله‌لری تاثیرسیز حالا گتیرن گوونلیک گوجلری، تخمینن 100 متر اوزونلوغوندا، ایچینده 4 اوتاق اولان بیر ماغارایلا قارشیلاشدی.

ماغارادا ائدیلن آختاریشدا دییشیک دیامترده سلاحلار، مهمات و حیات وسایلی تاپیلدی.

دیگر طرف‌دن، آمریکا خاریجی ایشلر ناظیرلیگی سؤزچوسو جان کیربی، اؤلکه‌سی‌نین، ترور تشکیلاتی پ.ک.ک ایله بیرباشا بیر علاقه‌سی اولمادیغینی سؤیله‌دی.

جان کیربی، گونده‌لیک مطبوعات کونفرانسین‌دان سونرا، ژورنالیست‌لرین سوال‌لارینی جوابلاندیرارکن، ترور تشکیلاتی پ.ک.ک ایله آمریکا آراسیندا بیرباشا ارتباط اولدوغونا دایر ادعا‌لاری قیمتلندیردی.

سؤزچو کیربی؛

"پ.ک.ک لیدرلریله بیرباشا ارتباط حالینده دئییلیک. اونلار خاریجی ترور تشکیلاتی‌دیر "دئدی.