تورکیه پنجرهسیندن اورتادوغو(22)
دونالد ترامپ دا سئچیم کامپانیاسی دؤورونده ایسلاما و ایسلام دونیاسینا مسافهلی دایاندی. پرزیدنت سئچیلدیکدن قیسا بیر مدت سونرا دا مسلمان یئددی اؤلکه وطنداشلارینین آمریکایا گیریشینه قاداغا قویدو
![تورکیه پنجرهسیندن اورتادوغو(22)](http://cdn.trt.net.tr/images/xlarge/rectangle/6f1e/ae8c/9244/5922c1fd44982.jpg?time=1719017968)
تورکیه پنجرهسیندن اورتادوغو(22)
آمریکا پرزیدنتی دونالد ترامپ ایلک خاریجی سفرینی اورتا شرقه، سعودی عربیستانینا رئاللاشدیردی. بیز ده بو هفته پروقرامیمیزدا ترامپین یاخین شرق سفرینی و بؤلگهیه عکس اولونمالارینی آنالیز ائدجگیک.
آتاتورک اونیورسیتهسی اولوسلار آراسی ایلیشکیلر بؤلومو آراشدیرماچی جمیل دوغاچ ایپکین موضوعیلا باغلی قیمتلندیرمهسینی تقدیم ائدیریک ...
--------
آمریکا اسکی باشقانی باراک اوباما وظیفهیه گلدیکدن قیسا مدت سونرا تورکیه و میصره سفر ائتدی. بو ایکی اؤلکهدکی آچیقلامالاری سببیله (آمریکانین یاخین شرق و ایسلام دونیاسینا ایستیقامتلی سیاستینه دایر) بؤیوک گؤزلمهلر میدانا گلدی. اوباما خصوصیله قاهیره چیخیشیندا دموکراسی وورغوسو ائتدی. آنجاق عینی اوباما میصرده چئوریلیشه سسینی چیخارمادی. تورکیهدکی کودتا گیریشیمینین آرخاسینداکی ترور تشکیلاتینی، فتونو گؤرممزلیکدن گلدی. سوریهدکی دموکراسی طلبلرینه آرخاسینی دؤندو. بئلهجه بؤیوک بیر خیال قیریقلیغینا یول آچدی. بو دؤورده آمریکانین بؤلگهدکی عنعنوی موتتفیقلری سعودی عربیستانی، میصر، تورکیه و ایسرائیل ایله ایرتیباطلار اوباما نزدینده اهمیتلی گؤرولمهدی. نوکلئر موقاویله وسیلهسی ایله اوباما رهبرلیگی ایران ایله علاقهلرده نورماللاشما پروسهسینه گیردی. ایرانین بؤلگهدکی ایشغالچیلیق داورانیشلارینا گؤز یومدو. یئنه عینی دؤورده سوریه، یمن و لیبی ایچ ساواشا سوروکلندی.
دونالد ترامپ دا سئچیم کامپانیاسی دؤورونده ایسلاما و ایسلام دونیاسینا مسافهلی دایاندی. پرزیدنت سئچیلدیکدن قیسا بیر مدت سونرا دا مسلمان یئددی اؤلکه وطنداشلارینین آمریکایا گیریشینه قاداغا قویدو. آنجاق ترامپ، ایسلام و ایسلام دونیاسی ایله علاقهلی رفتارینی دییشدیرمه میلینده. ایلک خاریجی سفری اوچون سعودی عربیستانینی سئچدی. ایکیلی علاقهلرین یانیندا 55 مسلمان اؤلکهنین لیدرلرینین و رهبرلرینین قاتیلدیغی بیر توپلانتیدا دانیشدی. اهمیتلی مساژلار وئردی. ترامپ اوّلکی دانیشمالارینداکی بیر سهوینی دوزلددی. بو دفعه ایسلام ایله ترورو بیر-بیریندن آییردی. ریاضداکی چیخیشیندا "رادیکال ایسلامی ترور" کیمی بیر دئییم ایستیفاده ائتمهدی. آمریکانین کلاسیک موتتفیقلرینه دؤنجگینی، ایرانی دا تهدید سایماغی داوام ائتدیرجگینی سؤیلهدی. ذیروه سونوندا ایشتیراکچی اؤلکهلر آراسیندا یاخین امکداشلیغی نظرده توتان 18 ماددهلیک ریاض بیاننامهسی نشر اولوندو. ریاض بیاننامهسی، تروریزم و ایران یاییلماجیلیغینین اؤنونه کئچمه بارهسینده اورتاق مسئولیتلر و وظیفهلر حاقیندا ائدن هر بیر دولت یول پلانی چکیر.
یاخین شرق توروندا، اوبامانین مسافهلی دایاندیغی سعودی عربیستانی و ایسرائیلله یئنی بیر صحیفه آچان ترامپ، فیلیسطین لیدری عباس ایله ده گؤروشدو. باریش، ایکی دولتلی حلدن بحث ائتدی. بو بؤلگه ایله علاقهدار یئنی بیر تلاش سیگنالی وئردی. ایسرائیل-فیلیسطین باریش دانیشیقلارینین یئنیدن باشلاماسی اوچون دؤورهیه گیرمک ایستدیگینی سؤیلهدی. مثبت بیر هاوا میدانا گلدی. آنجاق بو هاوانین فیلیسطین پروبلمینه حل گتیرجگی گؤزلنیلمیر. بؤلگهده آکتوال ریسک نقطهلری داها شمالدا. ایسرائیل-فیلیسطین مسئلهسی بو آندا آمریکا خاریجی سیاستینده اؤنجهلیک مسئله دئییل. بو سببدن قیسا وعدهده ایسرائیل-فیلیسطین مسئلهسینده بؤیوک دییشمهلر گؤزلنیلمیر.
ترامپ پرزیدنت اولمادان اوّل باشاریلی بیر ایش آدامی ایدی. دیپلوماسیده ده بو خصوصیتینی ایستیفاده ائدیر. چونکی سعودی عربیستانی زیارتینده 110 میلیارد دولاری نیظامی ساحهده اولماقلا، عمومی 480 میلیارد دولارلیق موقاویلهلر ایمضالانیب. ترامپین سعودی عربیستانی-ایسرائیل-واتیکان سیاحتیندکی پرفورمانسی داها دقتلی و دیپلوماتیک بیر یاناشماسی منیمسدیگینی گؤستریر. ترامپ، یاخین شرقده یئنی بیر بؤلگهسل امنیت معماریسی یارادیلماسی چاباسیندا. گؤروندوگو قدریله ترامپ رهبرلیگینین یاخین شرق سیاستیندکی اؤنجهلیکی بو: کؤرفزدکی عرب موتتفیقلریله، تورکیه و میصر کیمی مسلمان دولتلرله اولان علاقهلرینی یئنیلمک و عنعنوی موتتفیقلریله یئنی باشلانغیجلار ائتمک. بئلهجه ترامپ، اوباما رهبرلیگینین عکسینه آمریکانی یاخین شرقده یئنیدن تأثیرلی بیر آکتور حالینا گتیرمگی هدفلییر.
ترامپین اورتا شرق تماسلاری هئچ شبههسیز بیر چوخ بؤلگهسل مسئلهده عینی پوزسیونلاری آلان تورکیه و قطری تأثیر ائدهجک. سوریه، میصر، لیبی و ایرانا قارشی سیاستلرده تورکیه و قطر بنزر اؤنجهلیکلر چرچیوهسینده حرکت ائدیر. تورکیه و قطر سون دؤورده آمریکا ایله علاقهلرده آنلاشیلمازلیقلار یاشاییر. اوباما دؤورونده خصوصیله سوریه سیاستی سببیله آمریکایا اعتراض گؤسترن تورکیه، ترامپ دؤورونده آمریکا ایله داها ساغلام علاقهلر اینکیشاف ائتدیرمک مقصدینده. آنجاق گرک ترور تهدیدیله موباریزهده احتیاج ده ایرانا قارشی یارادیلان اتفاقدا آمریکا، تورکیه و قطرین دستگینی ایستییرسه تورکیهنین و قطرین اؤنجهلیکلرینی نظره آلمالی. ترسینی دوشونن و تلقین ائدنلر اولاجاق، آنجاق تورکیه و قطر چؤلده توتولاراق ائدیلهجک تلاشلارین باشارییا چاتماسی چتیندیر.
ترامپ اورتا شرق تماسلاری سیراسینداکی دانیشیقلاریندا تروریزمه قارشی موباریزه و امکداشلیق تئز-تئز وورغو ائتدی. یاخشی آمریکانین (ترور تشکیلاتی پ.ک.ک-نین سوریه قولو اولان) پ.ی.د / ی.پ.گ-یه اولان آچیق دستگینی نئجه یوروملاناقا؟ ترامپ رهبرلیگینین تورکیهنین بوتون طلبلرینه باخمایاراق پ.ی.د / ی.پ.گ-یه دستک وئرمهسی تروریزمله موباریزه موضوعسونداکی صمیمیتینین سورغولانماسینا دا سبب اولور.
------
آتاتورک اونیورسیتهسی اولوسلار آراسی ایلیشکیلر بؤلومو آراشماچی جمیل دوغاچ ایپکین موضوعیلا باغلی قیمتلندیرمهسینی تقدیم ائتدیک ...