تاتار: دانیشیقلارین باشلانماسی اوچون اورتاق اساس یوخ

قوزئی قیبریس تورک جمهوریتینین پرئزیدنتی ارسین تاتار قیبریس مسئله‌سی ایله باغلی دانیشیقلارین باشلانماسی اوچون اورتاق اساسین اولمادیغینی بیلدیریب.

ارسین تاتار قوزئی قیبریس تورک جمهوریتی مجلیسینده تخمینا 4 ساعات داوام ائدن قاپالی ایجلاسا قاتیلاراق، پارلامئنت عوضولرینی قیبریس مسئله‌سی حاققیندا سون حادیثه‌لرله باغلی معلوماتلاندیریب.

تاتار پارلامئنتین ایجلاسیندان سونرا مطبوعاتا آچیقلاماسیندا بیرلشمیش میلتلر تشکیلاتینین باش کاتیبینین شخصی نوماینده‌سی ماریا آنجلا هولگوین سوئلار ایله تماسلاری ایله باغلی بونلاری دئییب:

"بیز دانیشیقلارا حاضیریق، آما گؤرونن اودور کی، دانیشیقلار پروسه‌سینین باشلاماسی اوچون اورتاق اساس یوخدور. چونکی قارشی طرف بیزیم استقلالیمیزی قبول ائتمیر. بیزیم استقلالیمیزی قبول ائتمه‌ین طرفله دانیشیقلار پروسه‌سینده اوتورماغین معناسی یوخدور."

صبیرلی اولماغی و تورک دؤولتلری ایله موناسیبتلری یاخشیلاشدیرماغی تؤوصیه ائدن تاتار، "تورکیه‌نین دستیی ایله دونیا قیبریس حقیقتلرینی بیر داها اؤیرندی" دئدی.

تاتار، "قیبریسدا 2 آیری خالق، 2 آیری دؤولت، 2 آیری دئموکراسی وار و بو خالقلارین موباریزسی وار. باش وئرنلردن سونرا بیزیم موباریزمیز قوزئی قیبریس تورک جمهوریتینی تانیتماقدیر. قوزئی قیبریس تورک جمهوریتی تانینمالی و قیبریس تورک خالقینین بو تورپاقلاردا اؤز دؤلتینین دامی آلتیندا صولح، امین-آمانلیق و تهلوکه‌سیزلیک ایچینده یاشاماسی قبول ائدیلمه‌لیدیر. بیزیم باشقا اساسیمیز و مقصدیمیز یوخدور." دئدی.

قیبریس تورکلرینین‌ده روملار قدر استقلال حاقینا صاحیب اولدوغونو وورغولایان تاتار، بو تاریخی موستقیللیک حوقوقلارین بین الخلق موقاویله‌لره اساسلاندیغینا دقت چکیب.

سوسیال شبکه‌لرده پارلامئنتین قاپالی ایجلاسی ایله باغلی تنقیدلره‌ ده توخونان تاتار، "ادعا ائدیلدیگی کیمی قاپالی ایجلاسی ایستَین من دئییلم. من پرزیدنت اولاراق بورادا قاپالی ایجلاسین اولماسینی نه خواهیش ائتدیم، نه‌ده تکلیف ائتدیم. بو جور مسئله‌لر همیشه قاپالی ایجلاسلاردا موذاکیره اولونوب." قیمتلندیرمسینی ائتدی.