آذربایجانین انرژی ناظیری: کوپ 29دا تورکیه ایله بیرگه ایشله‌مک ایستَییریک

آذربایجانین انرژی ناظیری پرویز شاهبازوف بیرلشمیش میلتلر تشکیلاتینین ایقلیم دَییشیکلیگی اوزره چرچیوه کنوانسیونونون (کوپ 29) 29-جو طرفلر کنفرانسیندا تورکیه ایله امکداشلیق ائتمک ایستدیکلرینی بیلدیریب.

شاهبازوف پایتخات باکیدا کئچیریلن 29-جو اولوسلارآراسی خزر نفت و گاز سرگیسی چرچیوه‌سینده آنادولو آژانسینا قیمتلندیرمه‌لر وئریب.

شاهبازوف بیلدیریب کی، ایکی اؤلکه نفتدن طبیعی گازا، یئنیلنه بیلن انرژیدن توتموش الکتریک انرژیسی بیرلشمه‌لرینه قدر بیر چوخ ساحه‌لرده امکداشلیق ائدیر.

آذربایجانین تورکیه اوزریندن اوروپایا طبیعی گاز تدارک ائتدیگینی خاطیرلادان شاهبازوف، "ایمضالادیغیمیز یئنی موقاویله‌لرله تورکیه اوزریندن اوروپایا داها چوخ گاز گؤندره‌جَییک" دئدی.

شاهبازوف بو ایل نوامبرین 11-22-ده باکیدا کئچیریله‌جک کوپ 29 حاقیندا دا دانیشاراق،

"بیرلشمیش عرب امیرلیکلرینده، یعنی کوپ 28-ده الده اولونان اوغورلاری بیز ‌ده داوام ائتدیره‌جَییک. بیز بورادا دا تورکیه ایله بیرگه ایشله‌مک ایستَییریک. بیز بورادا (29-جو اولوسلارآراسی خزر نفت و گاز سرگیسی) بو باره‌ده دانیشدیق. بعضی لایحه‌لری بیرلیکده حاضیرلایاجاغیق." دئدی.

آذربایجانین یئنیلنه بیلن انرژی قایناقلارینین، خوصوصا‌ ده اؤلکه‌نین نخجیوان بؤلگه‌سینده ایستحصالینین، داها سونرا ایسه تورکیه بازارینا چیخاریلماسینین واجیبلیگینه توخونان شاهبازوف "اولوسلارآراسی عهده‌لیکلریمیزه اویغون اولاراق یئنیلنه بیلن انرژینی 3 دفعه آرتیرمالیییق." دئدی.

پرزیدنت رجب طیب اردوغان 29-جو اولوسلارآراسی خزر نفت و گاز سرگیسینین آچیلیشینا گؤندردیگی مئساژدا کوپ 29-آ ائو صاحیبلیگی ائده‌جک آذربایجانا حاضیرلیق پروسه‌سینده هر جور دستیی وئرمه‌یه حاضیر اولدوقلارینی بیلدیریب.

انرژی ساحه‌سینده گوجلو امکداشلیغا مالیک تورکیه و آذربایجان اوزون ایللردیر کی، باکی-تفلیس-جیحان خام نفت بورو کمری، باکی-تفلیس-ارضروم طبیعی گاز بورو کمری و ترانس-آنادولو طبیعی گاز بورو کمری (تاناپ) کیمی آلت‌یاپی سرمایه‌لری ایله ایکی اؤلکه‌ده اولدوغو کیمی بؤلگه و اوروپانین دا انرژی تحلوکه‌سیزلیگینه تحفه وئریر.