تورکیه بؤیوک میللت مجلیسینین صدری نعمان کورتولموش اؤزبکیستاندا
کورتولموش تورک دونیاسی اولاراق اورتا آسیادان آنادولو و بالکانلارا قدر اوزانان جغرافیادا علاقه‌لر، دوستلوق و قارداشلیغین گوجلندیریلمه‌سینین ضروری اولدوغونو وورغولاییب
تورکیه بؤیوک میللت مجلیسینین صدری نعمان کورتولموش رسمی سفرده اولدوغو تاشکندده اؤزبکیستان عالی مجلیسینین قانون‌وئریجیلیک مجلیسینین صدری نوردینجان ایسماعیلوف ایله گؤروشوب.
گؤروشده نعمان کورتولموش اؤزبکیستان پرزیدنتی شوکت میرضیایف‌ین رهبرلیگی ایله بیر ایصلاحات پروسه‌سینین یارادیلدیغینی، بونو تقدیر ائتدیکلرینی، بو پروسه سونوندا علم، اینجه‌صنعت، ادبیات و مدنیتده بؤیوک بیر دؤنوش الده اولوناجاغینا اومید ائتدیکلرینی بیلدیریب.
تورکیه ایله اؤزبکیستان آراسیندا «فؤوق‌العاده» آدلاندیریلا بیله‌جک بیر علاقه‌نین اولدوغونو بیلدیرن کورتولموش، ایکی اؤلکه لیدرلرینین ایکی‌طرفلی تیجارت حجمینی 10 میلیارد دولارا چاتدیرماق اوچون قارشییا قویدوغو مقصده چاتماغین مومکون اولدوغونو بیلدیریب.
کورتولموش تورک دونیاسی اولاراق اورتا آسیادان آنادولو و بالکانلارا قدر اوزانان جغرافیادا علاقه‌لر، دوستلوق و قارداشلیغین گوجلندیریلمه‌سینین ضروری اولدوغونو وورغولایاراق، بونون دونیا صلحونون تامین اولونماسی اوچون بؤیوک فرصت اولاجاغینا دقت چکیب.
تورکیه ایله اؤزبکیستان آراسیندا سیخ امکداشلیغی آرتیراراق تورک دونیاسینین اینکیشافینا تحفه وئره‌جکلرینی بیلدیرن کورتولموش، حؤکومتلر آراسیندا علاقه‌لرین گوجلندیریلمه‌سی اوچون پارلمانلارآراسی امکداشلیغا دا اؤنم وئردیکلرینی بیلدیریب.
چوخ‌طرفلی موناسیبتلرده اورتاق فعالیت گؤسترمه‌نین واجیبلیگینه دقت چکن کورتولموش، قوزئی قبرس تورک جمهوریتینین تورک دؤولتلری تشکیلاتینا مشاهده‌چی دؤولت استاتوسو ایله داخیل اولماسی اوچون اؤزبکیستان عالی مجلیسیندن دستک گؤزلدیکلرینی بیلدیریب.
اؤزبکیستان عالی مجلیسینین قانون‌وئریجیلیک مجلیسینین صدری ایسماعیلوف تورکیه ایله اؤزبکیستان آراسیندا هر ساحه‌ده امکداشلیغین ایلدن-ایله یوکسلمه‌سیندن ممنون اولدوقلارینی و علاقه‌لرین اینکیشافیندا پارلمانلارین ده بو ساحه‌ده امکداشلیغینا اؤنم وئردیکلرینی بیلدیریب.
تورکیه بؤیوک میللت مجلیسینین صدری کورتولموش اؤزبکیستان عالی مجلیسی سناسینین صدری تنزیله ناربایئوا ایله ده گؤروشوب.
کورتولموش و ناربایئوا ایکی اؤلکه‌نین پارلمانلاری آراسیندا امکداشلیق پروتکلونون حاضیرلانماسی ایله باغلی راضیلیغا گلیبلر.
