بو گون "آذربایجانلیلارین سویقیریمی گونو"دور
آذربایجان تورپاقلاریندا ارمنی چتهلرین ۱۰۶ ایل اؤنجه گئرچکلشدیردیگی قیرغین، "اؤلکه تاریخینین ان فجیع قیرغینلاریندان بیری" اولاراق گؤرولور
ارمنی چتهلر طرفیندن ۱۹۱۸ده گئرچکلشدیریلن، ۵۰ مین نفرین حیاتینی ایتیردیگی قیرغینین قوربانلاری، "آذربایجانلیلارین سویقیریمی گونو"نده آنیلیر.
آذربایجان تورپاقلاریندا ارمنی چتهلرین ۱۰۶ ایل اؤنجه گئرچکلشدیردیگی قیرغین، "اؤلکه تاریخینین ان فجیع قیرغینلاریندان بیری" اولاراق گؤرولور.
۲۰.جی عصرین باشلاریندا چار روسیاسینین سون دؤنملرینده آذربایجانین مختلیف بؤلگهلرینه یئرلشدیریلمیش ارمنیلر، اقتدار بوشلوغوندان دا فایدالاناراق آذربایجانلیلاری قتل ائتمهیه و تورپاقلارینی اله گئچرمهیه باشلادی.
۱۹۰۵دن اعتباراً تشکیلاتلانیب سلاحلانان ارمنیلر، آذربایجانلیلاری قورخدورماق اوچون باشدا باکی اولماق اوزره بوتون بؤلگهلرده قاریشیقلیقلار چیخاردی.
۱۹۱۷ده روسیادا گئرچکلشدیریلن اینقیلابلا چارلیک رژیمی ییخیلدی. اقتدارا گلن بولشئویکلر، باکیدا دا یؤنهتیمی اله گئچردی. بولشئویکلرین ارمنی لیدئری ایستپان شاهومیان، ارمنی چتهلره سیاسی و مادی دستک تامین ائتدی، بئلهجه آذربایجانلیلارا قارشی سالدیریلار آرتدی.
ارمنی و بولشئویک چتهلر، ۱۹۱۸ده ۳۰ مارس-۳ آوریلده باکی، شاماخی، قوبا، خاچماز، لنکران، حاجیقابول، سالیان، زنگهزور، قاراباغ، ناخچیوان و دیگر بؤلگهلرده ۵۰ مین آذربایجانلینی قتل ائتدی.
قیرغین، "قافقاز ایسلام اوردوسو" آدی وئریلهن عثمانلی اوردوسونون آذربایجانا کؤمگه گلمهسی و اؤلکهنی چتهلردن تمیزلمهسی ایله سونا چاتدی.
آذربایجاندا، ۱۹۱۸ده ارمنیلر طرفیندن اویقولانان ظلم و قیرغین "سویقیریم" اولاراق قبول ائدیلیر.
مرحوم جمهورباشقانی حیدر علییئو، ۱۹۹۸ده ایمضالادیغی فرمانلا ۳۱ مارسین "آذربایجانلیلارین سویقیریمی گونو" اولاراق آنیلانماسینا قرار وئرمیشدی.
آذربایجان جمهورباشقانی ایلهام علییئو، سوسیال مئدیا حسابلاریندان پایلاشیم ائدرک قیرغینین قوربانلارینی آندی.
آذربایجان خاریجی ایشلر باخانلغی دا "آذربایجانلیلارین سویقیریمی گونو" دولاییسیلا بیلدیری یاییملادی.
قوربانلارین حؤرمتله آنیلدیغی ایفاده ائدیلهن بیلدیرده، "ارمنیستانین آذربایجانا هوجومو و ایشغالی دؤنمینده تؤرهدیلن اتنیک تمیزلیک و سویقیریم سوچلاری، ۲.جی قاراباغ ساواشیندا عسگری عملیاتلارین دیشینداکی بؤلگهلرده وطنداشلارا قارشی ایشلهنهن ساواش سوچلاری، آذربایجانلیلارا قارشی سیستماتیک اتنیک نیفرت و خوشگؤروسوزلوک سیاستینین هله ده داوام ائتدیگینی گؤستردی" ایفادهسی یئر آلدی.
بیلدیریده، تاریخدن درس چیخاردیلماسی لازیم اولدوغو یازیلاراق، ارمنیستانا اینتیقامچی میللرین اؤنلهنمهسی چاغریسی ائدیلدی.