تورک قیزیل آیپارا جمعیتینین آذربایجاندا رمضان یاردیمی

تورک قیزیل آی جمعیتینین رمضان یاردیمی چرچوه‌سینده آذربایجاندا 500 عائله‌یه یاردیم باغلامالارینین پایلانماسینا باشلانیلیب.

تورکیه‌نین باکیداکی سفیری جاهد باغجی، تورک قیزیل آی اداره‌ هیئتینین عضوو مصطفی ساریلار و آذربایجان رسمیلرینین اشتراک ائتدیگی مراسیمدن سونرا تورک قیزیل آی جمعیتینین حاضرلادیغی ارزاق باغلامالاری آذربایجان قیزیل آی جمعیتی کؤنوللولرینین ایشتیراکی ا‌یله احتیاجی اولانلارا چاتدیریلیب.

تورک قیزیل آی اداره‌ هیئتینین عضوو ساریلار مراسیمده‌کی چیخیشیندا تورکیه‌نین هر زامان آذربایجانین یانیندا اولدوغونو و بو بیرلیگی سونا قدر داوام ائتدیره‌جکلرینی بیلدیریب.

ساریلار، "تورک قیزیل آی هر ایل دونیادا تخمیناً 8.8 میلیون اینسانا توخونور و بونون موقابیلینده بیز 500 میلیون دولار خرجلییریک" دئدی.

تورکیه‌نین باکیداکی سفیری باغجی دا تورکیه‌نین یاردیملارینی دوست و قارداش اؤلکه‌لره چاتدیردیغی اوچون تورک قیزیل آی جمعیتینه تشکور ائدیب.

تورک قیزیل آی جمعیتینین آذربایجانا یاردیملارینین سمبولیک اهمیت داشیدیغینی دئین باغجی، تورک قیزیل آی جمعیتینین و تورکیه‌نین دیگر غیر-حؤکومت تشکیلاتلارینین بوتون دونیادا مظلوملارین یانیندا اولدوغونو وورغولاییب.

بو ایل غزه‌یه داها چوخ دقت آییردیقلارینی ایفاده‌ ائدن باغجی، "35 مینه یاخین موسلمانین قانینین تؤکولدویو، مولکی اهالینین آیری-سئچکیلیک ائتمدن بومبالاندیغی بیر ظلم یاشاییریق و بو ظلمه قارشی ان آچیق شکیلده دایانان تورکیه‌دیر. سون زامانلار، بیرلشمیش میللت‌لر تشکیلاتینین تهلوکه‌سیزلیک شوراسی طرفیندن موقتی آتیش‌کس قراری وئریلدی. بو قرارین قالیجی اولماسی اوچون چالیشیریق. تورکیه‌ فیلیسطینین صلح و ایکی دؤولتلی حل دعواسینی دستکلمیه داوام ائدجک." دئدی.