آذربایجاندان میرزویانین آچیقلامالارینا جاواب گلدی
"ارمنیستان خاریجی ایشلر باخانینین اولوسلارآراسی توپلومو یانیلتماغا ایستیقامتلی بو جور آچیقلامالاری گئرچگی عکس ائتدیرمه‌مکده‌دیر"
آذربایجان خاریجی ایشلر باخانلیغی سؤزچوسو آیخان حاجیزاده، ارمنیستان خاریجی ایشلر باخانی آرارات میرزویانین اولوسلارآراسی توپلومو یانیلتماغا دایر آچیقلامالارینین حقیقتی عکس ائتدیرمه‌دیگینی ایفاده ائتدی.
آیخان حاجیزاده، آرارات میرزویانین ۱-۳ مارس تاریخلرینده تشکیل ائدیله‌ن آنتالیا دیپلوماسی فورومو (آدف) ۲۰۲۴ده، آنادولو آژانسینا وئردیگی آچیقلامالارا جاواب وئردی.
یازیلی آچیقلاما یاییملایان حاجیزاده، "ارمنیستان خاریجی ایشلر باخانینین اولوسلارآراسی توپلومو یانیلتماغا ایستیقامتلی بو جور آچیقلامالاری گئرچگی عکس ائتدیرمه‌مکده‌دیر" ایفاده‌لرینی ایشلتدی.
حاجیزاده، میرزویانین اگمنلیک و تورپاق بۆتوولوگونون قارشیلیقلی اولاراق تانینماسینا، آذربایجان ایله ارمنیستان آراسینداکی سرحدین تعیین اولونماسی قونوسوندا ۱۹۹۱ده ایمضالانان آلماتی بیلدیرگه‌‌سینه، بؤلگه‌ده‌کی نقلیات یوللارینین اولدوقلاری اؤلکه‌نین اگمنلیگی و یارغی صلاحیتی آلتیندا اولماسی لازیم اولدوغونا وورغو ائتدیگینی خاطیرلاداراق، "خاریجی ایشلر باخانینین، تمثیل ائتدیگی اؤلکه‌نین بوتون بو قانونلاری ۳۰ ایلده‌ن چوخ بیر مدت پوزدوغونو اونوتدورماغا چالیشماسی تاسف وئریجیدیر" سؤزلرینه یئر وئردی.
ارمنیستانین ۲.جی قاراباغ ساواشیندان سونرا دا قاراباغ‌داکی ایشغالچی رژیمی دستکله‌دیگینی، اونلارا سلاح و مهمات وئردیگینی، سلاحلی گوجلرینی آذربایجان تورپاقلاریندان چیخارمادیغینی خاطیرلادان حاجیزاده، آچیقلاماسیندا بو ایفاده‌لره یئر وئردی:
"ارمنیستانین اؤلکه‌میزین تورپاق بۆتوولوگونه و اگمنلیگینه قارشی ایندی ده داوام ائد‌ن ادعالاری، خاریجی ایشلر باخانینین دیله گتیردیگی فیکیرلرله ترسدیر. ارمنیستانین هر زامان استناد ائتدیگی آلما-آتا بیاننامه‌سینه قوشولارکن قویدوقلاری چقید شرط‌لری و قاراباغین آذربایجانین بیر پارچاسی اولاراق تانینماسینا قارشی گئچرلی قانونی پروتوکوللارین وارلیغینی هر کس بیلیر.
ارمنیستانین الده ائدیلن آنلاشما و تعهدلارا ضد اولاراق سون ۳ ایلدیر موختلیف بهانه‌لرله نقلیات خطلرینین آچیلماسینیا مانع تؤرتمه‌سی، بو مؤوضوعدا آنلاشمایا چاتیلماسی مقصدی ایله هئچ بیر حل تکلیف ائتمه‌مه‌سی، یالنیز پوپولیست بیانلارد وئرمه‌سی بؤلگه‌ده امکداشلیغا قاتقی تامین ائتمه‌یه‌ن فاکتورلارداندیر.
ارمنیستان، بو کیمی تخریباتچی و آذربایجان اقارشیدی سیاسی مانیپولاسیونلار احتیوا ائد‌ن دوشونجه‌لری دیله گتیرمک یئرینه اولوسلارآراسی تعهدلارا رعایت ائتمه‌لی و باریش پروسه‌سینه سؤزده دئییل عملده قاتقی وئرمه‌لیدیر".
ارمنیستان خاریجی ایشلر باخانی میرزویان، ارمنیستان اولاراق "سرحدلرین تعیین اولونماسی و چکیمینی نظرده توتان دمارکاسیون (سرحد تعیینی) پروسه‌سینین ۱۹۹۱ده ایمضالانان آلماتی بیلدیرگه‌سی چرچیوه‌سینده اولماسی لازیم اولدوغونو" ساووندوقلارینی، بو بیلدیرگه‌نین باریش آنلاشماسی متنینده یئر آلماسینی ایسته‌دیکلرینی آنجاق بو مؤوضوعدا آذربایجاندان مثبت جاواب آلابیلمه‌دیکلرینی ادعا ائتمیشدی.
ایلگیلی‌لی خبرلر
جمهور باشقانی اردوغان قازاخیستانین باش ناظیرینی قبول ائدیب
جمهور باشقانی رجب طیب اردوغان پایتاخت آنکارادا قازاخیستانین باش ناظیری اولژاس بکتنووو قبول ائدیب.
