"اسرائیل، ایرانا سالدیرماق اوچون آذربایجان تورپاقلارینی قوللانابیلمز"
آذربایجانین تل‌آویو ائلچیسی، اسرائیلین ایرانا قارشی اولاسی بیر سالدیریسیندا اؤلکه‌سینین تورپاقلاریندان ایستیفاده ائده‌بیلمه‌یه‌جگینی ایفاده ائتدی
آذربایجانین تل‌آویو ائلچیسی مختار محمدوو، اسرائیلین ایرانا قارشی اولاسی بیر سالدیریسیندا اؤلکه‌سینین تورپاقلاریندان ایستیفاده ائده‌بیلمه‌یه‌جگینی ایفاده ائتدی.
اسرائیلین جروزالم پست قزئتینه دانیشان محمدوو، آذربایجانین، اسرائیل‌دن تامین ائتدیگی بؤیوک اؤلچکلی سلاح وارداتینا قارشیلیق بو اؤلکه‌یه عسگری عملیاتلاریندا کؤمک ائتمک اوچون هاوا آلانی حاضیرلادیغینا دایر اسرائیل مطبوعاتیندا چیخان خبرلری یالانلادی.
یاخین زاماندا ائلچی اولاراق تل‌آویوه تعیین ائدیله‌ن محمدوو،
"آذربایجان باشیندان بری باشقا اؤلکه‌لرین ایچ ایشلرینه قاریشمایاجاغینی و تورپاقلارینین باشقا اؤلکه‌لره قارشی ایستیفاده ائدیلمه‌سینه ایجازه وئرمه‌یه‌جگینی بیان ائتمیشدیر. چونکو دیگر اؤلکه‌لرین ده بیزیم ایچ ایشلریمیزه قاریشماماسینی گؤزله‌ییریک" دئدی.
محمدوو، مطبوعات‌دا بونون عکسینه چیخان ادعالارین "اساسسیز" اولدوغونو ایفاده ائتدی.
اسرائیل‌دن سلاح وارد ائتمه‌نین ایسه نورمال اولدوغونا ایشاره ائد‌ن آذربایجان‌لی ائلچی، "هر اؤلکه اؤز تورپاق بوتونلوگونون و وطنداشلارینین اگمنلیگینین قورونماسیندان و مدافعه اولونماسیندان مسئولدور. آذربایجان دا بیر استثنا دئییل. اسرائیل چوخ ساییدا سلاح تولید ائدیر، بونا گؤره بو سلاحلاری اسرائیل‌دن ساتین آلماق نورمال" دئیه دانیشدی.
آذربایجان، ۲۷ سپتامبر ۲۰۲۰ده باشلایان و ۴۴ گون داوام ائد‌ن ۲.جی قاراباغ ساواشیندا، ۳۰ ایل اؤنجه ارمنیستانین ایشغال ائتدیگی تورپاقلارینی قورتارمیشدی.
ایرانین بو تاریخدن اعتباراً آذربایجانا قارشی توتومو و سرحدده‌کی عسگری مانورلاری ایکی اؤلکه ایلیشکیلرین‌ده گرگینلیگی آرتیرمیشدی.
ایرانین رسمی اولاراق "تکرارلانان مانورلار" اولاراق آچیقلادیغی عسگری گوج گؤستریسی، آذربایجان طرفیندن ارمنیستانا دستک و ایرانین بو سرحد بؤلگه‌سینده‌کی دییشیکلیکلری قبول ائتمه‌یه‌جگینه دایر بیر مئساژ حساب ائدیلمیشدی.
