علییئو: بؤیوک پلانلاریمیز وار
"آذربایجاندا چوخ مثبت سرمایه اورتامی مؤوجوددور. نفت و گاز بؤلومونه بؤیوک سرمایه‌لر چکدیک"
آذربایجان جمهورباشقانی ایلهام علییئو، اؤلکه‌سینین تخمیناً ۲۰۰ گیگاواتلیق یئنیلنه‌بیلیر انرژی پتانسیلینه صاحب اولدوغونو ایفاده ائد‌رک،
"ایندی هدفیمیز یئنیلنه‌بیلیر انرژی" دئدی.
علییئو، بیرلشمیش عرب امرلیکلرینین باشکندی ابوظبی‌ده تشکیل ائدیله‌ن سۆردوروله‌بیلیرلیک هفته‌سینین آچیلیش مراسیمین‌ده ائتدیگی دانیشمادا، یئنیلنه‌بیلیر انرژی قایناقلارینین اؤنمینه توخوناراق، آذربایجانین بو ساحه‌ده بؤیوک پتانسیله صاحب اولدوغونو، یئنیلنه‌بیلیر انرژی قایناقلارینی اینکیشاف ائتدیره‌رک هم صادراتلارینی چئشیدلندیره‌جکلرینی هم ده چئوره دوستو اقتصاد بؤلومو اولوشدوراجاقلارینی دیله گتیردی.
اؤلکه‌سینین یئنیلنه‌بیلیر انرژی پتانسیلینه توخونان علییئو،
"قورودا ۲۷ گیگاوات کۆلک و گونش، ایشغالدان قورتاریلان تورپاقلاریمیزدا ۱۰ گیگاوات کۆلک و گونش، خزر دنیزینین آذربایجان کسیمین‌ده ۱۵۷ گیگاوات کۆلک انرژیسی پتانسیلی وار. یعنی تخمیناً ۲۰۰ گیگاواتلیق یئنیلنه‌بیلیر انرژی پتانسیلیمیز وار. بیزه صادرات یوللاری لازیمدیر. بوتون بو پروژه‌لری آددیم آددیم حیاتا گئچیریریک" دئدی.
علییئو، دونن بیرلشمیش عرب امیرلیکلری مصدر شیرکتی ایله آذربایجان دؤولت نفت شیرکتی (سوکار) آراسین‌دا ۴ گیگاواتلیق کۆلک و گونش انرژیسی مرکزلرینین قورولماسی قونوسون‌دا آنلاشما ایمضالاندیغینی ایفاده ائد‌رک،
"بو، هله‌لیک قیسا وعده‌لی بیر پروژه. اورتا وعده‌لی پرویژه‌لر نتیجهسینده گۆج ۱۰ گیگاواتا چیخاریلاجاق. یول خریطه‌میز ده حاضر. مصدر ایله امکداشلیغیمیز آذربایجانی چوخ اؤنملی بیر یاشیل انرژی صادراتچیسینا چئویره‌جک" ایفاده‌لرینی ایشلتدی.
آذربایجانین اولوسلارآراسی انرژی شیرکتلریله ایمضالادیغی مموراندوم و آنلاشمالار سایه‌سینده تخمیناً ۲۲ گیگاوات کۆلک و گونش انرژیسی اۆره‌تیله‌جگینی بیلدیره‌ن علییئو،
"آذربایجاندا چوخ مثبت سرمایه اورتامی مؤوجوددور. نفت و گاز بؤلومونه بؤیوک سرمایه‌لر چکدیک. ایندی هدفیمیز یئنیلنه‌بیلیر انرژی. بؤیوک پلانلاریمیز وار و بو ایشلری باجاراجاغیمیزدان آرخایینام" شکلینده دانیشدی.
