علییئو: آذربایجان، آوراسیانین اؤنملی نقلیات مرکزلریندن بیریدیر
"آذربایجان، قاراباغ و دوغو زنگه‌زورون یئنی‌دن قورولماسی و احیاسی ایله اولوسلارآراسی نقلیات باغلانتیلارینین گلیشدیریلمه‌سی اوچون گئنیش چالیشمالارا باشلادی"
آذربایجان جمهورباشقانی ایلهام علییئو، ۲.جی قاراباغ ساواشیندان سونرا قورتاریلان بؤلگه‌لرین تیکینتی و احیاسی ایله اولوسلارآراسی نقلیات باغلانتیلارینین گلیشدیریلمه‌سی اوچون گئنیش مقیاسلی چالیشمالارا باشلادیقلارینی بیلدیردی.
تۆرکمنیستانین باشکندی عشق آباددا گئچیریله‌ن ۶.جی خزریانی اؤلکه‌لرین دؤولت باشقانلاری ذیروه‌سینده دانیشان علییئو، آذربایجانین خزریانی اؤلکه‌لرین امکداشلیغینا بؤیوک اؤنم وئردیگینی وورغولادی.
علییئو، خزرین حقوقی استاتوسونا دایر ۲۰۱۸.جی ایلده آغ‌تاودا ایمضالانان سندین قوه‌یه مینمه‌سی ایله خزره ساحلی اولان دؤولتلر آراسیندا هر طرفلی تعامل و امکداشلیغی آماجلایان داها تاثیرلی تدبیرلر اوچون ساغلام بیر حقوقی تمل یارادیلاجاغینی بیلدیردی.
خزرده داشیماچیلیغین اؤنمینه توخونان ایلهام علییئو،
"بو گون آذربایجان، آوراسیانین اؤنملی نقلیات و لجستیک مرکزلریندن بیریدیر. آذربایجان دوغو-باتی و قوزئی-گونئی اولوسلارآراسی نقلیات ددالانلارینین گلیشیمینده اؤنملی رول اویناییر. بیز ترانس‌خزر اولوسلارآراسی داشیمالارین وئریملی ایستیفاده‌سی اوچون چالیشیریق" دئدی.
۲-جی قاراباغ ساواشیندا آذربایجانین غلبه‌سیندن ده دانیشان علییئو،
"آذربایجان، قاراباغ و دوغو زنگه‌زورون یئنی‌دن قورولماسی و احیاسی ایله اولوسلارآراسی نقلیات باغلانتیلارینین گلیشدیریلمه‌سی اوچون گئنیش چالیشمالارا باشلادی. زنگه‌زور دالانی آرتیق حقیقته چئوریلیر" دئدی.
علییئو، ائکولوژیک وضعیتله باغلی ساحل‌یانی اؤلکه‌لرین قایغیلارینی بؤلوشدوکلرینی و خزرده‌کی ائکولوژیک پروبلئملرین حلی یولوندا امکداشلیغین گئنیشلندیریلمه‌سیندن یانا اولدوقلارینی قید ائتدی.
