اود چرشنبهنیز قوتلو اولسون!
عنعنهیه گؤره، بو گون تونقال قالاییب، آلووون اوزریندن آتیلماقلا بوتون پیسلیک و آزار-بئزارلاری یاندیریرلار
آذربایجانلیلارین قدیم بایراملاریندان بیری اولان یئنی ایل بایرامی، یارادیلیشین مرحلهلرینی عکس ائتدیرهن دؤرد عنصور؛ سو، اود، یئل و تورپاقلا باغلی مراسیملرین قوتلانماسی گلهنکلرینی اؤزونده بیرلشدیریر.
ایلین آخیر چرشنبهلریندن ایکینجیسی خالق آراسیندا اۆسکو چرشنبه، آددی چرشنبه کیمی تانینان اود چرشنبهسیدیر. بو چرشنبه قدیم اینسانلارین گونشه، اودا اولان اینامیندان ایرلی گلیر. عادت-عنعنهیه گؤره، بو گون تونقال قالاییب، آلووون اوزریندن آتیلماقلا بوتون پیسلیک و آزار-بئزارلاری یاندیریرلار.
گونش ایستیسینی آرزولایان اولو بابالاریمیز اود چرشنبهسینده سحر تئزدن گونشه قوربان آپاراردیلار. بؤیوک تونقال قالاییب گونشین چیخماسینی گؤزلهیر، اودون شرفینه نغمهلر اوخویاردیلار. تونقال سؤنندن سونرا قیزلار و اوغلانلار کولو ییغیب اونو کندین کنارینا، یا دا یولا سپیردیلر. بو بیر نؤوع تونقالدان آتیلمیش آداملارین آزار بئزارینن چیخیب گئتمهسینی سمبولیزه ائدیر. قدیم دؤورده تونقالی یئتکینلیک یاشینا چاتمامیش اوغلان اوشاغی چاخماق داشی واسطهسی ایله قالایاردی. بئله اود مقدس ساییلاردی. تاریخیمیزده ائله دؤورلر اولوب کی، اودون اوزریندن آتیلماقلا محکوملار قورتولوبلار. دئملی گناهسیزدیر کی، اود اونو یاندیرماییب.
اود چرشنبهسینین باشقا ماراقلی مراسیملریندن بیری ده ایل بویو عایله عضولریندن بیرینی ایتیرمیش ائولرین قارشیسیندا تونقال قالاماقدی. اود یاندیرماقلا همین عایلهنین ساخلادیغی یاس مراسیمینه سون قویولاردی. اینسانلارا اوراز/آراز (اود، آتش) آدینین وئریلمهسی، ائولرده اوزرلیک یاندیریلماسی، خبیث روحلاردان قورونماق مقصدی ایله قویون سورولرینین یانماقدا اولان کوللارین آلتیندان گئچیریلمهسی، تندیرین مقدس ساییلماسی، اوندان آرزولارین گئرچکلشمهسینین ایستنیلمهسی، یانماقدا اولان اوجاغی سؤندورمهمک و مزار داشلارین اوزرینده آتشدانلارین حک ائدیلمهسی و باشقا نومونهلر ده تۆرکلرین اودا اولان حؤرمت و احترامینی گؤستریر. قدیمده ائولرده اوجاغی سؤنمهیه قویموردولار. یالنیز کیمسه اؤلموش اولارسا اودو چیخاریب اؤزل یئرده ساخلاییر و قیش واختی ۵ گوندن سونرا، یایدا ایسه بیر آیدان سونرا اودو ائو قایتاراردیلار.
ایلگیلیلی خبرلر
آذربایجان باشباخانی تورکیهده
آذربایجان باشباخانی، جمهورباشقانی رجب طیب اردوغان طرفیندن ده قبول ائدیلهجک