علییئو: ارمنیستانلا ایلیشکیلر قورماغا حاضیریق

آذربایجان جمهورباشقانی ایلهام علییئو، ارمنیستان ایله ایلیشکی‌لر قورماق ایسته‌دیکلرینی، آوروپا بیرلیگینین اؤزلرینه بو قونودا کؤمک‌ ائده‌بیله‌جگینی سؤیله‌دی.

علییئو، آوروپا بیرلیگینین آذربایجانا یئنی تعیین ائدیله‌ن نماینده‌سی پتر میچالکونو قبول ائتدی.

قبول‌دا دانیشان علییئو، آوروپا بیرلیگی ایله بیر چوخ قونودا یاخین چالیشما ایچریسینده اولدوقلارینی ایفاده ائد‌رک قاراباغ ساواشی سونراسی دؤورده قالخینما، قالیجی باریش و امکداشلیغین قورولماسینا آوروپا بیرلیگینین قاتقی وئره‌بیله‌جگینی دوشوندوکلرینی سؤیله‌دی.

آذربایجان جمهورباشقانی بونلاری قید ائتدی:

"بیز صحیفه‌نی چئویرمک و قونشوموز ارمنیستانلا ایلیشکی‌لر قورماق ایسته‌ییریک. باریش آنلاشماسی، سرحد خطینین تعیین اولونماسی و ایلیشکی‌ باغلانتیلارینین آچیلماسی اوچون مذاکیره‌لره باشلاماغا حاضیریق. بو سوره‌ج قیسماً باشلامیش‌دیر. اما آوروپا بیرلیگی آکتیو اولاراق قاتیلسا کی، بئله بیر آرزو گؤروره‌م، بیزه بیر چوخ ساحه‌ده یاردیمچی اولابیله‌جگینی دوشونوره‌م. عمومیتله گونئی قافقازداکی وضعیت، ۳۰ ایلدیر اولمایان تامامیله یئنی بیر آشامایا گئچه‌بیلر. بو ثابت‌لیک، اؤنگؤروله‌بیلیرلیک و باریش اوچون چوخ اؤنملی بیر فاکتور اولابیلر".