علییئو: باریشی دوشونمهنین زامانی گلدی
"آذربایجان، ارمنستان اوردوسونون تورپاقلاریمیزدان تامامیله و شرطسیز اولاراق گئری چکیلمهسینی طلب ائدن بیرلشمیش ملتلر امنیت شوراسی قرارلارینی اؤزو یئرینه یئتیردی"
آذربایجان جمهورباشقانی ایلهام علییئو،
"ایندی باریشی دوشونمهنین و صحیفهنی چئویرمهنین زامانی گلدی" دئدی.
ایلهام علییئو، ارمنستان گؤروشمهلرینین آردیندان آذربایجانا گئچهن آوروپا بیرلیگی شوراسی باشقانی شارل میشل ایله بیر آرایا گلدی.
ایش یئمهیینده بیر آرایا گلن علییئو و میشل، داها سونرا اورتاق مطبوعات کنفرانسی تشکیل ائتدی.
آوروپا بیرلیگینین آذربایجانین باشلیجا تیجارت اورتاغی اولدوغونو وورغولایان علییئو، تیجارتلرینین تخمیناً یوزده ۴۰ینی آوروپا بیرلیگی ایله ائتدیکلرینی و اؤلکهسینده، آوروپا بیرلیگی اؤلکهلریندن مین ۷۰۰دن چوخ شیرکتین فعالیت گؤستردیگی معلوماتینی پایلاشدی.
علییئو، آذربایجان تورپاقلارینین ارمنستان طرفیندن اوزون مدتلی ایشغالینا سون وئردیکلرینی ایفاده ائدرک، بونلاری سؤیلهدی:
"آذربایجان، ارمنستان اوردوسونون تورپاقلاریمیزدان تامامیله و شرطسیز اولاراق گئری چکیلمهسینی طلب ائدن بیرلشمیش ملتلر امنیت شوراسی قرارلارینی اؤزو یئرینه یئتیردی و آذربایجان، ساواشی سونا چاتدیردی. ایندی باریشی دوشونمهنین و صحیفهنی چئویرمهنین زامانی گلدی. بیز بونا حاضیریق. بو گون سایین میشل ایله پلانلاریمیزی، گیریشیملریمیزی و یئنی وضعیته دایر یاناشمالاریمیزی احاطهلی مذاکره ائتدیک. نیسبتاً قیسا مدتده یاخشی نیت و چوخ پراگماتیک بیر یاناشما سرگیلهیهرک، هله ده ماسادا قالان پروبلئملرین چوخونو حل ائدهبیلهجگیمیزی و داها گئنیش بؤلگهسل امکداشلیغین تمللرینی آتابیلهجگیمیزی دوشونورهم. آوروپا بیرلیگی، بو قونودا چوخ اؤنملی رول اویناماقدادیر و اوینایاجاغیندان آرخایینام".
"ایرواندان گتیردیگی مئساژلاری آذربایجان جمهورباشقانی علییئوه چاتدیردیغینی" ایفاده ائدن میشل ایسه، آوروپا بیرلیگینین بو قونودا ممکن اولدوغونجا مثبت و یاپیجی رول اویناماغا حاضر اولدوغونو سؤیلهدی.