ظریف: سیزی قوتلاییریق

آذربایجان جمهورباشقانی ایلهام علی‌یئو، اؤلکه‌سی ایله ایرانین، بوتون بؤلگه اؤلکه‌لرینین فایداسی اوچون چابالارینی موافق حالدا یئریتمه‌سی لازیم اولدوغونو سؤیله‌دی.

پرزیدنت علی‌یئو، گؤروشمه‌لر اوچون باشکند باکی‌یا گئدن ایران خاریجی ایشلر باخانی جواد ظریفی قبول ائتدی.

قبول‌دا دانیشان علی‌یئو، ایران ایله آذربایجان آراسین‌داکی تجارت حجمین‌ده آرتیش اولدوغونو، سالقینا باخمایاراق بو وضعیتین مثبت سیر ائتدیگینی دیله گتیردی.

علی‌یئو، بوتون ساحه‌لرده بؤیوک ایر‌لیله‌مه‌لر قید ائتدیکلرینی، آذربایجان ایله ایران آراسین‌داکی ایلیشکی‌لرین تاریخ‌ده‌کی ان یوکسک سویه‌ده اولدوغونو ایفاده ائتدی.

داغلیق قاراباغ ساواشی سونراسین‌دا بؤلگه‌ده یئنی ایمکانلار میدانا گلدیگینی خاطیرلادان علی‌یئو،

"البته ایکی قارداش اؤلکه اولاراق آذربایجان و ایران، بوتون بؤلگه اؤلکه‌لرینین یاراری اوچون چابالارینی موافق حالدا یئریتمه‌لی و بؤلگه‌ده اوزون وعده‌لی و قالیجی باریشین گلیشمه‌سینه قاتقی وئرمه‌لی‌دیر. ایران حکومتینین ده عینی یاناشیمی پایلاشدیغینا امینم" دئدی.

ظریف ده، ایران ایله آذربایجان آراسین‌داکی ایلیشکی‌لرین سویه‌سین‌دن ممنونیت دویدوقلارینی سؤیله‌دی.

آذربایجان تورپاقلارینین ایشغال‌دان قورتاریلماسین‌دا علی‌یئوین تاریخی رول اوینادیغینی وورغولایان ظریف، "سیزی قوتلاییریق. ایندی ایسه بؤلگه‌یه باریشین گتیریلمه‌سین‌ده تاریخی بیر رول اوینایابیلرسینیز. ارمنستان ایله باریشی ساغلاما آرزونوزو ایفاده ائتدیگینیز اوچون سیزی تقدیر ائدیریک. بو چوخ اؤنملی و ایران، باریشین تامین ائدیلمه‌سینین یانین‌دا قورتاریلان بؤلگه‌لرین بایندیرلیغی و یئنی‌دن قورولماسین‌دا ایشتیراک ائتمه‌یه حاضر" دئدی.