جمهور باشقانی اردوغان: "آذربایجان داستان یازماغا داوام ائده‌جک"
جمهور باشقانی رجب طیب اردوغان آذربایجانین داستان یازماغا داوام ائدجگینی سؤیله‌ییب.
ائرمنیستان طرفیندن ایشغال اولونموش آذربایجان اراضی‌لری‌نین آزاد اولونماسی موناسیبتیله آذربایجان پرزیدنتی ایلهام علی یئو، جمهور باشقانی رجب طیب اردوغان و تورک عسگرلری‌نین ده ایشتیراکی ایله پایتاخت باکی-نین آزادلیق میدانیندا ظفر پارادی کئچیریلیب.
مراسیمه قاتیلماق اوچون دسامبرین 9-دا آذربایجانا سفر ائدن جمهور باشقانی اردوغان مراسیمده ائتدیگی چیخیشدا، "اومید ائدیرم کی، آذربایجان قارداشیم ایلهام علی یئوین لیدرلیگی آلتیندا داستان یازماغا داوام ائده‌جک. آذربایجانین تورپاق‌لارینی ایشغالدان آزاد ائتمه‌سی موباریزه‌نین بیتمه‌سی دئمک دئییل" دئییب.
"تورکیه اولا‌راق آذربایجان ایله موناسیبت‌لریمیزده اؤزوموزه همیشه بؤیوک اؤندر حیدر علی یئوین "بیر میللت، ایکی دؤولت" شعارینی رهبر توتموشوق. غازی مصطفی کمال آتاتورکون تعبیرینجه، "آذربایجانین کدری کدریمیز، سئوینجی سئوینجیمیزدیر". بو آنلاییشلا قاراباغی 30 ایل بویونجا سینه‌میزده یارا ائتدیک. بو گون بو یارانین ساغالماسی‌نین سئوینجینی پای‌لاشماق اوچون بیرلیکدییک. آذربایجانین اراضی‌لرینی ایشغالدان آزاد ائتمه‌سی موباریزه‌نین بیتمیش معناسی داشیمیر. بو گوندک سیاسی و حربی ساحه‌ده آپاریلان موباریزه بوندان سونرا چوخ فرق‌لی جبهه‌لرده داوام ائده‌جک. ایللردیر دوغولدوغو یئرلردن اوزاق قالان، مملکت حسرتی ایله یانان 1 میلیون قاچقین و مجبوری کؤچکون قارداشیمیز آرتیق دوغولدوق‌لاری اراضی‌لره قاییتماق اوچون سبیرسیزلنیر. اینشاالله، ان قیسا مودتده بو قارداش‌لاریمیزین حسرتی‌نین سونا چاتاجاغینا اینانیریق. عزیز قارداش‌لاریم، داغلیق قاراباغا داغینتی، قتل عام و گؤز یاشیندان باشقا هئچ نه گتیرمه‌ین‌لرین ده آرتیق عقل‌لارینی باشینا ییغماسی لازیم‌دیر. ائرمنی رهبرلر خالقین قایناق لارینی آذربایجانین اراضی‌لرینی ایشغال آلتیندا ساخلایا بیلمک اوچون ایستیفاده ائدیب. حالبوکی بو قایناق لار معنا‌سیز مودافعه خط‌لرینه، سلاح‌لارا، گؤزلرینی کین و قان بوروموش رهبرلرین احتیراص لارینا خرجلنمه‌میش اولسایدی، بو دقیقه منظره تامام فرق‌لی اولاردی. ائرمنی سیاستچی‌لرین بونو یاخشی تحلیل ائده‌رک باریش و ثابیتلیگین اساسیندا گله جگینی قورماسی یولوندا جسور آددیم‌لار آتاجاغینا اومید ائدیریک. ائرمنیستان خالقی‌نین دا اؤزلرینی کئچمیشین یالان‌لاری ایله باشینی قاتان، کاسیبلیغا محکوم ائدن دیاسپورون اسارتیندن قورتولماسینی دیلییریک. باتی ایمپریالیست‌لری‌نین دستکلمه‌سی ایله هئچ نیه نایل اولونمایاجاغی گؤرولمه‌لی، دوشمنچی‌لیک یئرینه مهریبان قونشولوق اساسیندا موناسیبت‌لر یئنی‌دن موذاکیره اولونما‌لی‌دیر. ائرمنیستان خالقی قاراباغدا یاشانان‌لاردان درس چیخارارسا، بو، بؤلگه‌ده یئنی بیر دؤورون باشلانغیجی اولا‌جاق. تورکیه و آذربایجان بیرلیکده چتین‌لیک‌لرین عهده سیندن گلمه‌یه، اوغورلار الده ائتمه‌یه داوام ائده‌جک‌دیر" دئیه جمهور باشقانی اردوغان قئید ائدیب.
