سئل قوربانلاری آنیلدی
"باشین ساغ اوْلسون آذربایجان! اۇرمو بیلیمیۇردو اؤیرنچیلری اوْلاراق سئل و سۇ داشقینی نَدنییله یاشامینی ایتیرن سوْیداشلاریمیزی ایچدن سایغییلا آنیر، بۇ دَرین آجی اۆزوندن تۆرک میللتینه باشساغلیغی دیلهییریک"
اۇرمو بیلیمیۇردو اؤیرنچیلرینين سئل و سۇ داشقینی نَدنییله یاشامینی ایتیرن آذربایجانلیلاری آنما توْپلانتیسی بیلیمیۇردو حراستی'نین مداخلهسینه باخمایاراق باشارییلا سوْنوجلاندی.
بۇگۆن اوْنلارجا اۇرمو بیلیمیۇردو اؤیرنچیسی سۇ داشقینیندا یاشامینی ایتیرن تۆرک وطنداشلارینی سایغییلا آندیلار. اۇرمو بیلیمیۇردو اؤیرنچیلری توْپلانتیدان اؤنجه مجتمع فرهنگینین آمفی تئاترینا ییغیشدیلار، اؤیرنچیلردن بیری دانیشیغینی آذربایجاندا باش وئرن سۇ داشقینیندا یاشامینی ایتیرنلره آدایاراق مرکز مئدیاسی و دؤولت قۇروملارینین تۆرکلرین آجیلی اوْلایلارینا کئچمیشده اوْلدوغو کیمی بیرداها آلدیرماز یاناشماسینی وۇرغولادی.
ائلهجه، تۆرکلرین سۇ داشقینی، قاراداغ زلزلهسی و بنزَر اوْلایلاردا بۇنجا ایتکی وئرمه ندنینین، آذربایجاندا اۇیغون آلتیاپیلارین اوْلماماسی و میللتیمیزین ساوۇنماسیز قالماسی اوْلاراق آچیقلادی. آردیندا، ان چوْخ یئرآلتی و یئر اۆستو قایناقلاری اوْلان آذربایجانین ان چوْخ وئرگی اؤدهین بؤلگه اوْلماسینین قبول ائدیلمز اوْلدوغو ایرهلی سۇرولدو.
اؤیرنچیلر ساعات ۱۳-ده چاغیریشینی یاییملادیقلاری یئره، بیلیمیۇردون مرکزی رستورانینین قاباغینا دوْغرو یۆرویهرک اوْرادا تۆرکجه یازیلی بنر و پلاکارتلارینی آچیب یاشامینی ایتیرن سوْیداشلاریمیزین آنیسینا چیچک بۇداغی بۇراخدیلار.
اؤیرنچیلرین آچدیغی بنرده بئله یازیلمیشدی: "باشین ساغ اوْلسون آذربایجان اۇرمو بیلیمیۇردو اؤیرنچیلری اوْلاراق سئل و سۇ داشقینی نَدنییله یاشامینی ایتیرن سوْیداشلاریمیزی ایچدن سایغییلا آنیر، بۇ دَرین آجی اۆزوندن تۆرک میللتینه باشساغلیغی دیلهییریک".
بیلیمیۇردو گۆونلیک گۆجلری اؤیرنچیلرین بۇ توْپلانتیسینی قاریشدیرمایا قالخیشاراق تۆرکجه بنرلری ییغیشدیرمایا و جیب تئلفونلارینی زوْرلا آلمایا چالیشدیلار.اؤیرنچیلرین کسکین تپکیسییله قارشیلاشان حراست گۆجلری گئری چکیلمک مجبوریتینده قالدیلار. سوْنوندا اؤیرنچیلر بیلیمیۇردون مسجیدینه دوْغرو یوْلاچیخیب آنیم توْپلانتیلارینی باشا چاتدیردیلار.
خبر و شکیللر اؤیرنجیلر طرفیندن گؤندریلمیشدیر
ایلگیلیلی خبرلر
قازاخیستان-دا داشقینلاردان سونرا 54،7 مین نفر ائولرینه قاییدیب
بو بارهده فوق العاده حاللار ناظیرلیگینین مطبوعات خیدمتی معلومات یاییب.