آذربایجاندا "آسان ویزا" دوورو باشلاییر

آذربایجانا گلن توریست‌لر آرتیق توریزم شیرکت‌لری واسطه‌سی ایله یوخ، الکترون فورمادا آسان خیدمت‌دن ویزا آلا بیله‌جک‌لر.

81 اؤلکه‌نین وطنداشی "آسان ویزا" سیستمین‌دن ایستیفاده ائده‌رک آذربایجانا سفر ائده بیله‌جک.

آذربایجان پرزیدنتی ایلهام علی یف الکترون ویزا‌لارین وئریلمه‌سی پروسه دورونون ساده لشدیریلمه‌سی و "آسان ویزا" سیستمی‌نین یارادیلماسی حاقیندا فرمان ایمضالاییب.

الکترون ویزا سیاهی‌سی آذربایجان جمهوریتی‌نین خاریجی ایشلر ناظیرلیگی طرفیندن تصدیق ائدیلن اؤلکه‌لرین وطنداش‌لارینا و همین اؤلکه‌لرده دایمی یاشایان وطنداش‌لیغی اولمایان شخص‌لره وئریلیر.

آسان ویزا پورتا‌لی‌نین تقدیمات مراسیمینده چیخیش ائدن آذربایجان جمهوریتی پرزیدنتی یانیندا وطنداش‌لارا خیدمت و سوسیال اینوواسیون‌لارعذره دؤولت آژانسی‌نین صدری اینام کریم اف بیلدیریب کی، "آسان ویزا" واسطه‌سیله خاریجیلر  ائولرین‌دن چیخما‌دان، نؤوبه گؤزلمه‌دن، سندلر توپلاما‌دان اونلاین شکیلده "evisa.gov.az " سایتین‌دان مراجعت ائده‌رک ویزا آلا بیله‌جک‌لر.

دؤولت آژانسی‌نین صدری قئید ائتدی کی، اؤلکه‌ده قالما مدتینی 30 گونه ده ک معین ائدن بیر دفعه لیک الکترون ویزانی آلماق اوچون پورتالا مراجعت ائدن شخص اؤدنیش ائتدیک‌دن سونرا ویزا 3 ایش گونو مدتینده الکترون پست آدرسینه گؤندریله‌جک.

ویزانین اجرتی 20 آمریکا دو‌لاری‌دیر. بو مبلغ ویزایا باخیلماسی اوچون طلب اولونور و هئچ بیر حالدا گئری قایتاریلمیر. الکترون ویزا مراجعت‌لری‌نین بیر نفرلیک، عائله (ان آز 2، ان چوخ 10 نفر) و قروپ شکلینده (ان آز 10، ان چوخ 300 نفر) ائدیلمه‌سی نظرده توتولور.

"آسان ویزا" پورتا‌لی 2017-جی ایل ژانویه نین 10-دان تام ایستیفاده‌یه وئریله‌جک.