"طرح نو" گونده‌لیگیندن تورک‌لره ادبسیزجه سالدیری

تبریزده یایینلانان "طرح نو" گونده‌لیگی اوشاقلارا اؤزل صحیفه‌سینده "هفت خوان رستم" باشلیغی آلتیندا یاییملادیغی بیر یازیدا تورکلری تربیه‌سیزجه آشاغیلادی.

فرودوسی‌نین شاهنامه‌سینه دایاناراق منثور شکیلده قلمه آلینان، تورکلرین و فارسلارین ساواشینی آنلادان یازیدا تورکلره آچیق بیچیمده و ادبسیزجه حقارتلر ائدیلیر.

تورکلره "بدبخت و بد نژاد" ایفاده‌لری ایله خطاب ائدیلن یازیدا قادینلار دا آشاغیلانیر. عرقچیلیقدا بئله افسانه اولان یالانچی پهلوان رستمین دیلیندن، تورکلر قادینلارلا ائش‌دگر ساییلیر. بئله‌جه قادینلاری آشاغی گؤرن بیر ذهنیت تورکلری ده آشاغیلایاجاغینی سانیر.

سپاه گوجلرینه باغلی اولدوغو ادعا ائدیلن گونده‌لیگین بو یایینی سوسیال مئدیادا تورکلرین بؤیوک تپکی‌سی ایله قارشیلانیر.