قیبریس پروبلمینه حلّ مذاکیره‌لرین یئنی‌دن باشلاماسی‌نین اوزرین‌دن تام بیر ایل کئچدی
لیدرلر، بو چتین موضوعلارین عهده‌سین‌دن گلمه قونوسوندا قرارلی اولدوق‌لارینی وورغولادی‌لار
قیبریس پروبلمینه قالیجی حلّ اوچون حیاتا کئچیریلن مذاکیره‌لرین یئنی‌دن باشلاماسی‌نین اوزرین‌دن تام بیر ایل کئچدی.
15 می 2015-جی ایلده یئنی‌دن باشلایان مذاکیره پروسه‌سی‌نین بیرینجی ایلدؤنومونده طرف‌لر اورتاق بیر آچیقلاما ائتدی.
قوزئی قیبریس تورک جمهوریتی‌نین پرزیدنتی مصطفی آکینجی و گونئی قیبریس روم رهبرلیگی لیدری نیکوس آناستاسیادیس، یازیلی اولا‌راق ائتدیک‌لری آچیقلاما‌لاریندا، بیر دفعه داها حلّ اولان اینانجلارینی تصدیق ائتدیلر.
آچیقلامایا گؤره، هله ده بعضی چتین‌لیک‌لر و فرق‌لی‌لیک‌لر اولسا دا لیدرلر گلینن نقطه‌دن ممنون.
آغیر بیر مذاکیره ایلی اولدوغونا دقت چکن لیدرلر، بو چتین موضوعلارین عهده‌سین‌دن گلمه قونوسوندا قرارلی اولدوق‌لارینی وورغولادی‌لار.
لیدرلر آچیقلاما‌لاریندا بیر-بیرلری‌نین حساس‌لیق‌لاری‌نین و حقوق‌لارینا دقت گؤستره‌رک، قازان-قازان قایداسینا اساس‌لانان بیر حلّ چاتماغی آماچلادیق‌لاری‌نی وورغولادی‌لار.
آچیقلامادا ایکی لیدر بو ایفاده‌لره یئر وئردی:
"عادل و قالیجی بیر حلّین یالنیز قیبریسه باریش و ریفاه گتیرمکله قالمایاجاغی، عینی زاماندا بؤلگه‌ده ده ثابت‌لیک و امکداش‌لیق آدینا یاخشی بیر اؤرنک اولاجاغینا اولان اینانجیمیزی دا بیر دفعه داها تکرارلاماق ایستییریک. 2016-جی ایلین ایچینده قالیجی بیر حلّ چاتما هدفیمیز اوچون اؤنوموزدکی آیلاردا تلاشلاریمیزی گوجلن‌دیرمک قرارلی اولدوغوموزون دا وورغولاماق ایستییریک. "
قیبریس مذاکیره‌لری، 8 اوکتوبر 2014 تاریخینده روم لیدر آناستاسیادیسین ماسا‌دان چکیلمه‌سی ایله کسیلمه‌یه معروض قالمیشدی.
بیرلشمیش میللتلر تشکیلاتی‌نین باش کاتیبینین قیبریس اؤزل موشاویری اسپن بارت اید-ین واسیطچی‌لیگینده دانیشیق‌لار، 15 می 2015 تاریخینده یئنی‌دن باشلامیشدی.
