۸ آذربایجان عسگری شهید اولدو
شدتلی آتیشمادان سونرا ارمنی بؤلمهلری بیر چوخ ایتکی وئرهرک گئری چئکیلمهیه مجبور ائدیلدی
آذربایجان و ارمنیستان اوردولاری جبهه خطینده گئجه بویو چاتیشدی.
آذربایجان آژانسلاریندان آلتینان بیلگیه گؤره، ارمنیستان سلاحلی بیرلیکلری اؤتن گئجه جبههنین آیری آیری ایستیقامتلرینده آتیشکسی پوزاراق آذربایجان اوردوسونون کنترلوندا اولان یئرلره گیرمهیه گیریشدیلر. شدتلی آتیشمالاردا آذربایجان اوردوسونون ۸ عسگری شهید اولدو.
آذربایجان ساوونما باخانلیغی مطبوعات خیدمتینین یایدیغی بیلگییه گؤره، جولایین اوتوز بیریندن آگوستون بیرینه گئچن گئجه ارمنی کشفیات-تخریبات قروپلاری آغدام و ترتر بؤلگهلرینده جبهه خطینی گئچمهیه چالیشدی.
آذربایجان سلاحلی گوجلری بیرلیکلرینین ساییقلیغی نتیجهسینده ارمنی بیرلیکلرینین یاخینلاشماسی اؤنجهدن بللی ائدیلهرک تخریباتین قارشیسی آلیندی. شدتلی آتیشمادان سونرا ارمنی بؤلمهلری بیر چوخ ایتکی وئرهرک گئری چئکیلمهیه مجبور ائدیلدی.