پاکیستاندا ترمومترلر 50 درجه‌نی گؤستردی
اؤلکه‌نین موختلیف شهرلرینده هاوانین ایستیلیگینین 40 درجه‌دن یوخاری اولدوغو بیلدیریلیب
دونن پاکیستاندا ترمومترلر 50 درجه‌نی گؤستریب.
پاکیستان متئورولوژی اداره‌سیندن وئریلن آچیقلامادا لاهوردا ایستیلیگین 43 درجه‌یه یوکسلدیگی، رطوبتین ایسه یوزده 17 اولاراق اؤلچولدویو قید ائدیلیب.
آچیقلامادا اؤلکه‌نین موختلیف شهرلرینده هاوانین ایستیلیگینین 40 درجه‌دن یوخاری اولدوغو بیلدیریلیب.
مووافیق اولاراق، ترمومترلر سند ایالتینین دادو و موئنژودارودا 50، نوابشاه و سوکوردا 49، متهیده 46، بلوچیستان ایالتینده سیبی و تربتده 48، پنجاب ایالتینین بهاوالپوردا 47 درجه ایستی گؤستریب. کراچیده ایستیلیک 36 درجه، روطوبت ایسه یوزده 50 اولاراق آچیقلانیب.
مسئوللار خالقی ایستی دالغالاری و ایستی وورماسی سببین‌دن اؤلوم ریسکلرینه قارشی خبردار ائدیب. آچیقلامادا ضرورت اولمادیقجا چؤله چیخماماق تؤوصیه ائدیلیب، مایعات ایچیلمه‌سینه ده دقت یئتیریلمه‌سی تؤوصیه ائدیلیب.
2015-جی ایلده اؤلکه‌ده گؤرولن حدیندن آرتیق ایستیلر زامانی ترمومترلر 49 درجه گؤستردی و اکثریتی کراچی شهرینده تخمینا 2 مین آدام دهیدراسیون و ایستی وورماسی نتیجه‌سینده حیاتینی ایتیردی.
