کنیادا داشقینلاردا حیاتینی ایتیرنلرین سایی 277-یه یوکسلیب
اؤلکه داخیلینده 62 ساغلاملیق مرکزینین ضرر گؤردویونو قید ائدن حؤکومت سؤزچوسو اپیدمیلرین باشلادیغینی و 53 وبا حادیثهسینین آشکار ائدیلدیگینی بیلدیریب
![کنیادا داشقینلاردا حیاتینی ایتیرنلرین سایی 277-یه یوکسلیب](http://cdn.trt.net.tr/images/xlarge/rectangle/68f1/931c/5d7e/66430781d8011.jpg?time=1722046353)
کنیادا آوریل آیینین اورتالاریندان بو یانا یاغان گوجلو یاغیشلارین سبب اولدوغو داشقینلاردا حیاتینی ایتیرنلرین سایی 277-یه یوکسلیب.
حؤکومت سؤزچوسو آیساک مواورا، داشقینلاردا حیاتینی ایتیرنلرین سایینین 277-یه یوکسلدیگینی، الوئریشسیز هاوا شرایطیندن تخمینا 411 مین اینسانین تأثیرلندیگینی و 56 مین عائلهنین ائولرینی ترک ائتمک مجبورییتینده قالدیغینی بیلدیریب.
اؤلکه داخیلینده 62 ساغلاملیق مرکزینین ضرر گؤردویونو قید ائدن مواورا اپیدمیلرین باشلادیغینی و 53 وبا حادیثهسینین آشکار ائدیلدیگینی بیلدیریب.
کنیادا داشقینلار نتیجهسینده 9 مین دکار کند اراضیسی ضرر گؤررکن، 4 مین چیفتلیک حیوانی تلف اولوب.
حؤکومت داشقینلاردان ضرر چکنلر اوچون 167 دوشرگه یارادیب.
دوغو آفریقا اؤلکهلری آراسیندا تانزانیا، سومالی، بروندی و کونگو دموکراتیک جمهوریتی ده گوجلو یاغیشلارین یاراتدیغی داشقینلاردان منفی تأثیرلنیر.