بیر قادینین بئینیندن جانلی سوخولجان چیخاریلدی

استرالیانین باشکندی کانبرادا عملیاتلا بیر قادینین بئینیندن ۸ سانتیمتر اوزونلوغون‌دا جانلی سوخولجان چیخاریلدی.
امرجین اینفکشیس دزیسس درگیسینه گؤره، ۶۴ یاشین‌داکی قادین، ژانویه ۲۰۲۱ده ۳ هفته بویونجا سوره‌ن قارین آغریسی و اسهالین یانیندا قورو اؤسکورک، قیزدیرما و گئجه‌لری آشیری ترله‌مه کیمی شیکایتلرله خسته‌خانایا گئتدی.
قادینین شیکایتلری آراسینا ۲۰۲۲ده اونوتقانلیق و دپرسیون دا علاوه اولونونجا، کانبرادا بیر خسته‌خانایا گؤندریلدی.
ام‌آر تاراماسی ائدیله‌ن قادین‌دا آنورمال بئیین فعالیتلری معین ائدیلمه‌سی سببی ایله عملیات گئچیرمه‌سینه قرار وئریلدی.
عملیات سیراسیندا دکترلار، قادینین بئینیندن ۸ سانتیمتر اوزونلوغوندا و ۱ میلیمتر ائنینده جانلی سوخولجان چیخاردی.
آراشدیریلماسی اوچون لابوراتورا گؤندریله‌ن "اوفیداسکاریس روبرتسی" آدلی سوخولجانین عمومیتله پیتونلاردا گؤروله‌ن بیر پارازیت اولدوغو معین ائدیلدی.
سؤزو گئدن پارازیتین اینسانلاردا گؤرولدوگونه دایر داها اؤنجه راپور اولمادیغی قید ائدیلدی.
خسته‌نین ائوینین یاخینلاریندا بیر گؤل اولدوغو و گؤلون اطرافین‌دا پارازیتین یاشادیغی پیتون نؤوعونون اولدوغو ایفاده ائدیلدی.
قادینین گؤل اطرافین‌داکی اوتلارا توخونماسی یا دا اطرافدان ییغدیغی بیتکیلردن یئمکلرده ایستیفاده ائتمه‌سی نتیجه‌سینده، ایلانین بوشالتیم یولویلا آتدیغی پارازیتین یومورتاسینین قادینین بد‌نینه گیردیگی دوشونولور.
دکترلار، سؤزو گئدن حادثه‌نین، ایر‌لی‌ده حیوانلاردان اینسانلارا خسته‌لیک بولاشماسی تهلوکه‌سینه ایشیق توتدوغونو وورغولادی.