اقیانوس سولارینین ایستیلیگی ان یوکسک سویه‌یه چاتدی
ساکیت و آتلانتیک اقیانوسلارین‌داکی جدی ایستیلشمه ایله بیرلیکده قوزئی یاریم‌کۆره‌ده رکورد قیران ایستی هاوا دالغالاری و قوراقلیق حادثه‌لرینین آرتدیغی بیلدیریلدی
گئچه‌ن ایل دونیادا اقیانوس سولارینین ایستیلیگی ان یوکسک سویه‌یه چاتدی.
گاردین قزئتینین خبرینه گؤره، چوخ ساییدا بیلیم اینسانیندان اولوشان اکیبین یئریتدیگی بیر آراشدیرمادا، اینسانلارین یاراتدیغی یایینیم (امیسیون)دان اورتایا چیخان ایستیلیگی چکن اقیانوسلارین ۲۰۲۲-جی ایلده ان یوکسک ایستیلیگه چاتادیغی و بونون ایقلیم سیستمین‌ده درین دییشیکلیکلره سبب اولدوغو بیلدیریلدی.
آمریکا بیرلشمیش دؤولتلرینده سن توماس بیلیم‌یوردوندان پروفسورو جان آبراهام، کۆره‌سل ایستیلشمه‌نین یۆزده ۹۰دان چوخونون اقیانوسلارا گئتدیگینی ایفاده ائدرک،
"اقیانوسلارین ایستیلشمه‌سی سببی ایله داها آشیری هاوا شرایطی یاشاییریق. بونون بوتون دونیادا قورخونج تأثیرلری وار" دئدی.
"ادونسیز این اتموسفیریک ساینسیز" آدلی آکادمیک ژورنال‌دا یاییملانان آراشدیرمایا گؤره، ۱۹۵۸-جی ایلده‌ن اعتیباراً ثبت ائدیله‌ن بیلگیلر، ۱۹۹۰ ایلی اعتباری ایله ایستیلشمه‌نین سورعتلنمه‌سی ایله بیرلیکده اقیانوس ایستیلیگینده بؤیوک بیر آرتیش اولدوغونو گؤستریر.
آراشدیرمادا، ساکیت و آتلانتیک اقیانوسلارین‌داکی جدی ایستیلشمه ایله بیرلیکده قوزئی یاریم‌کۆره‌ده رکورد قیران ایستی هاوا دالغالاری و قوراقلیق حادثه‌لرینین آرتدیغی بیلدیریلدی.
دونیا مئتئورولوژی هؤرگوتو، اکتبر آییندا بوتون آنا گۆلخانا گازلارینین اتموسفردیک کنسانتراسیون (تغلیظ) نسبتینین رکورد سویه‌لره چاتدیغینی بیلدیرمیشدی.
