"هر یئددی ثانیه‌ده بیر قیز اوشاغی ائولندیریلیر"
چوخ ساییدا قاچقین اوغوشون قیز اوشاق‌لارینی یوخسوللوق‌دان و جینسی ساتاشمادان قوروماق اوچون ارکن ائولندیردیگی بیلدیریلیر
کؤمک قورولوشو سئیو ده چیلدرینا گؤره دونیادا هر یئددی ثانیه‌ده بیر، 15 یاشین آلتین‌داکی بیر قیز اوشاغی ائولندیریلیر.
قورولوشون "ائوری لست گیرل- هر بیر قیز اوشاغی" آدلی چالیشماسیندا اؤلکه‌لر؛ اوخوللاشما، اوشاق یاشدا ائولی‌لیک، حامیله قالما، آنا اؤلوم‌لری و پارلمان‌داکی قادین ساییسینا گؤره سیرا‌لانیر.
بونا گؤره قیز اوشاق‌لاری باخیمین‌دان 144 اؤلکه‌ده حیات کیفیتی ان یاخشی اؤلکه سوئد اولدو.
فنلاند، نروژ، هلند و بلژیک ایلک بئشده یئر آلان اؤلکه‌لر.
لیسته‌نین سون اوچ سیراسیندا ایسه، مرکزی آفریقا جمهوریتی، چاد و نیجر یئر آلیر.
قورولوشون آراشدیرماسینا گؤره افغانیستان، یمن، هیندیستان و سوما‌لی‌نین ده آرا‌لاریندا اولدوغو بعضی اؤلکه‌لرده یاش‌لاری 10-آ قدر دوشن قیز اوشاق‌لاری ائولنمه‌یه زورلانیر.
قیز اوشاق‌لارینی ائرکن ائولی‌لییه مجبور ائدن فاکتورلار آراسیندا، چاتیشما، یوخسوللوق و اینسانی بحران‌لار ساییلیر.
سئیو ده چیلدرین یؤنیتیم قورولو باشقانی هل تورنینگ شمیدت، "اوشاق یاشدا ائولی‌لیک‌لر، قیز اوشاق‌لارینی ان تمل اؤیرنمه، اینکیشاف و اوشاق اولما حوقوقون‌دان محروم ائدیر. ائرکن ائولنن اوشاق مکتبه گئده‌بیلمیر و اوغوش(عایله) ایچی شدت، ساتاشما و تجاووزله قارشیلاشما احتیمال‌لاری آرتیر. حامیله قالیرلار و اچ.آی.وی ده داخیل جینسی یوللا بولاشان خسته‌لیک‌لره آچیق حالا گلیرلر" دئدی.
آراشدیرمادا، قاچقین دوشرگه‌لرینده یاشایان قیز اوشاق‌لاری‌نین، ارکن ائولنمه تهلوکه‌سی آلتیندا اولدوغو بیلدیریلیر.
چوخ ساییدا قاچقین اوغوشون قیز اوشاق‌لارینی یوخسوللوق‌دان و جینسی ساتاشمادان قوروماق اوچون ارکن ائولندیردیگی بیلدیریلیر.
یونیسف‌‍‌ین حسابلاما‌لارینا گؤره، بو گون 700 میلیون اولان اوشاقکن ائولن‌دیریلن قادین‌لارین ساییسی، 2030 اعتیباریله 950 میلیونا چیخا‌جاق.
