فاتح دؤنمز: "معدن محصول‌لاری‌نین صادراتیندا یئنی رکورد قیریلا‌جاق"

انرژی و طبیعی ثروت‌لر ناظیری فاتح دؤنمز تورکیه-نین معدن محصول‌لاری‌نین صادراتیندا رکورد قیریلدیغینی بیلدیریب.

ناظیرلیگین معلوماتیندا "معلومات‌لار گؤستریر کی، بو ایل ده معدن محصول‌لاری‌نین صادراتیندا یئنی رکورد گلیر" ایفاده‌سی یئر آلیب.

ناظیرلیک‌دن وئریلن معلوماتا گؤره، 2021-جی ایلده جمهوریت تاریخینده رکورد قیران و 5،93 میلیارد دو‌لارلیق صادراتا ایمضا آتان معدن چیخارما سئکتورو 2022-جی ایله رکورد هدفله داخیل اولوب.

یئنی بازارلار آختاریش‌لارینی داوام ائتدیرن و مؤوجود بازارلارا علاوه دگرلی محصول‌لار صادر ائدن سئکتوردا ایلین 6 آییندا اوولکی ایلین مووافیق دؤورو ایله موقاییسه‌ده صادرات 19 فایز آرتا‌راق 2 میلیارد 82 میلیون دو‌لاردان 3 میلیارد 36 میلیون دو‌لارا یوکسلیب.

صادراتدا ایلک یئری 713 میلیون دو‌لارلا چین، ایکینجی یئری 328 میلیون دو‌لارلا امریکا، اوچونجو یئری ایسه 214 میلیون دو‌لارلا بولقاریستان توتوب.

محصول اساسیندا 484 میلیون دو‌لارلا ایشلنمیش مرمر، 306 میلیون دو‌لارلا بلوک مرمر و تراورتن، 301 میلیون دول‌لارلا سینک بیرینجی یئری توتوب.

آچیقلامادا فیکیرلرینه یئر وئریلن ناظیر دؤنمز تورکیه-نین یئرآلتی ثروت‌لره گؤره دونیانین قاباقچیل اؤلکه‌لریندن بیری اولدوغونو بیلدیریب.

سون ایللرده تورکیه اقتصادیاتی‌نین بؤیومه‌سینده صادراتین آپاریجی رول اوینادیغینی بیلدیرن ناظیر دؤنمز دئییب:

"بیزیم معدن محصول‌لاری صادراتیمیزدا دا بو لوکوموتیو‌لر آراسیندا، حتی اؤن سیرا‌لاردا‌دیر. کئچن ایل معدن محصول‌لاری صادراتیندا جمهوریت تاریخی‌نین رکوردونو قیردیق. معلومات‌لار گؤستریر کی، بو ایل بو ساحه‌ده یئنی رکورد گلیر. داها بیر سئویندیریجی اینکیشاف اودور کی، بو آرتیمدا یاری محصول و حاضیر محصول‌لارین آرتیمی موشاهیده اولونور. علاوه دگرلی محصول‌لارین صادراتینی داها دا آرتیرماقلا اؤلکه‌میزه داها چوخ ارز قازاندیراجاغیق".

ناظیر دؤنمز یئرآلتی ثروت‌لری طبیعته و اطراف محیطه ضرر وئرمه‌دن اقتصادیاتا قازان‌دیرماق اوچون چالیشدیق‌لارینی بیلدیریب:

"هر زامان دئدیگیمیز کیمی. نه اطرافیمیزدان، نه ده معدن‌لریمیزدن ایمتینا ائدیریک. اونا گؤره ده اطراف محیطه حؤرمت ائدن، اطراف محیطه حساس اولان میللی معدن سیاستی ایله حرکت ائتمه‌یه داوام ائدجییک".