تورکیه 6 آی عرضینده صادراتدا رکوردا ایمضا آتدی

تورکیه‌-نین بو ایلین ژانویه-ژوئن آیلاری دؤورونده قونشولاری - ایران، یونانیستان، عراق، گورجوستان، سوریه و بولقاریستانا ائتدیگی صادرات کئچن ایلین عینی دؤورونه گؤره 36،5 آرتا‌راق 9،1 میلیارد دو‌لار اولوب.

ایلین ایلک 6 آییندا صادراتینی کئچن ایلین عینی دؤوروله موقاییسه‌ده 40 فایز آرتیران، 105 میلیارد دو‌لارا چیخارا‌راق رکوردا ایمضا آتان تورکیه قونشولارینا دا صادراتینی آرتیریب.

تورکیه ژانویه-ژوئن آیلاریندا ایران، یونانیستان، عراق، گورجوستان، سوریه و بولقاریستانا 9 میلیارد 140 میلیون 56 مین دو‌لارلیق صادرات گئرچکلشدیریب. سؤزوگئدن مبلغ کئچن ایلین عینی دؤورونده 6 میلیارد 695 میلیون 978 دو‌لار سویه‌سینده ایدی. بئله‌جه، بو اؤلکه‌لره ائدیلن صادرات بو ایلین ایلک 6 آییندا کئچن ایلین عینی آیینا نیسبتن 36،5 فایز آرتیب.

تورکیه-‌نین 6 آیدا قونشولارینا ائتدیگی صادراتین سکتورلارا گؤره بؤلومونده شیمیایی ماده و محصولات لار ایلک سیرادا یئر آلیر. بو سکتوردان 6 قونشو اؤلکه‌یه 1 میلیارد 546 میلیون 340 مین دو‌لارلیق صادرات ائدیلیب. اوندان سونرا تاخیل، پاخلا، یاغلی توخوم محصول لاری (1 میلیارد 101 میلیون 876 مین دو‌لار) و پولاد (760 میلیون 921 مین دو‌لار) گلیر.