خارجیلر ان چوخ آنتالیادان ائو آلیر

تورکیه‌ده‌ خاریجیلر، هر بئش ائو‌دن بیرینی آنتالیادان ساتین آلیر.
دنیزی، قومو، گونشی، لوکس تاسیسلری و تاریخی بینالاری ایله توریستلرین ان سئودیگی تعطیل مرکزلرین‌دن بیری اولان آنتالیا، داشینماز املاک ساحه‌سین‌ده خاریجیلر طرفین‌دن ان چوخ سئچیله‌ن شهرلر آراسین‌دا یئر آلدی.
املاک و داشینماز املاک یاتیریم اورتاقلیغی عضوو سلمان اؤزگون، یئنی نؤوع کوروناویروس سالقینینا باخمایاراق، آنتالیادا املاک ساتیشلارین‌دا آرتیش اولدوغونو بیلدیررک،
"گئچه‌ن ایل آنتالیادا ۱۰۴ مین ۱۶۰ ملک ساتیلدی. بو رقم ۲۰۱۹.جو ایلده ۹۰ مین ۷۶۱ ایدی. املاک ساتیشلاری سالقینا باخمایاراق ۲۰۲۰.جی ایلده بیر اؤنجه‌کی ایله گؤره یوزده ۱۵ آرتدی" دئدی.
تعطیل اوچون گلنلرین بعضیلرینین تورکیه‌نی چوخ سئودیگی اوچون داشینماز املاک آلاراق بورادا قالدیغینی دیله گتیره‌رک،
"تورکیه‌ده سون ۵ ایلده خاریجیلره ساتیلان ۱۶۶ مین ۳۸۱ ائودن ۳۳ مین ۶۸۳ ائوین ساتیشی آنتالیادا اولدو. بو نیسبت، آنتالیانین یوزده ۲۰،۲لیک پای آلدیغینی گؤستریر. یعنی تورکیه‌ده خاریجیلره ساتیلان هر بئش ائودن بیری آنتالیادا گرچکلشیر" دئیه دانیشدی.