روسیا-دا تورکیه-روسیا صنایع فورومو کئچیریلدی

روسیانین یکاترینبورگ شهرینده باشلایان و تورکیه‌نین بو ایل طرفداش اؤلکه اولدوغو INNOPROM اولوسلار آراسی صنایع سرگی‌سی چرچیوه‌سینده خاریجی ایقتیصادی علاقه‌لر شوراسی (DEİK) طرفین‌ن تورکیه-روسیا صنایع فورومو کئچیریلدی.

فوروم تورکیه‌-نین صنایع و تکنولوژی ناظیری مصطفی وارانک، روسیانین صنایع و تیجارت ناظیری دنیس مانتوروو، روسیا فدراسیاسی‌نین تاتاریستان موختار جمهوریتی نین پرزیدنتی روستم میننیخانوو، تیجارت ناظیری‌نین معاوینی قؤنچه ییلماز باتور و DEİK تورکیه-روسیا ایشگوزار شوراسی‌نین صدری تونجای اؤزیلحانین ایشتیراکی ایله باش توتدو.

وارانک بورادا ائتدیگی چیخیشیندا تورکیه و روسیا آراسینداکی موناسیبت‌لری ایکی اؤلکه لیدرلری آراسیندا یاخین دیالوق و گوج‌لو سیاسی ایراده سایه‌سینده داها دا اینکیشاف ائتدیرمک مسئله‌سینده قرارلی اولدوق‌لارینی سؤیله‌دی.

روسیانین تورکیه‌نین مهم تیجارت طرفداشی اولدوغونو وورغولایان وارانک ایکی اؤلکه آراسینداکی تیجارت حجمی‌نین کئچن ایله گؤره 15 فایزلیک بیر آرتیم گؤستردیگینی بیلدیردی، هدف‌لری‌نین 100 میلیارد دو‌لارلیق حجمی الده ائتمک اولدوغونو قئید ائتدی.

تورکیه و روسیا آراسینداکی بیرباشا سرمایه‌لرین ده آرتماسینی آرزو ائتدیک‌لرینی وورغولایان ناظیر ایستراتژی طرفداشلیغین درینلشمه‌سی اوچون ایکی اؤلکه صاحیبکارلاری و سرمایچی‌لری‌نین داها چوخ حوسلندیریلمه‌سی‌نین واجیب‌لیگینی وورغولادی.

روسیا صنایع و تیجارت ناظیری مانتوروو دا چیخیش ائده‌رک روسیا و تورکیه آراسیندا تیجارت علاقه‌لری‌نین سون ایللرده ثابت شکیلده اینکیشاف ائتدیگینی سؤیله‌دی.

تورکیه ایله امکداش‌لیغینی اینکیشاف ائتدیرمک اوچون هر نوع  دسته‌یه حاضر اولدوق‌لارینی قئید ائدن مانتوروو: "تورکیه-‌نین ایش آدام‌لاری‌نین روسیایا داها راحت گلمه‌لری و اوزون موددت‌لی سرمایه‌لرله گلن ایش اینسان‌لارینی دستکلمک اوچون بیر سیرا پاکت‌لر حاضیرلامیشیق. ایمتیازلی شرط‌لر یارادیریق" ایفاده‌لرینی ایشلتدی.

چیخیش‌لاردان سونرا تورکیه و روسیا قوروم‌لاری، تشکیلات و فیرما‌لاری آراسیندا امکداش‌لیق موقاویله‌لری ایمضالاندی.