تۆرک جمهوریتلرینده گئچن هفته
تۆرک جمهوریتلرینده قارشیلیقلی سفرلر و امکداشلیغین گوجلندیریلمه‌سی ده داوام ائتمکده‌دیر
۱۲-۱۳ ژانویه ۲۰۲۳-جو ایل تاریخلرین‌ده تۆرک دؤولتلری تشکیلاتینین باش کاتیبی کوبانیچبک عؤمورعلییئو ماجاریستان‌دا سفر گئرچکلشدیردی. بوداپست‌ده باش کاتیب عؤمورعلییئوی ماجاریستانین باشباخانی ویکتور اوربان قبول ائتدی. باش کاتیب عؤمورعلییئو و باشباخان اوربان نقلیات و انرژی، اکینچیلیک و طبیعی قایناقلارین ایداره اولونماسی کیمی اؤنجه‌لیکلی ساحه‌لرده عملی امکداشلیغین داها دا گئنیشلندیریلمه‌سی ایله باغلی فیکیر آلیش وئریشی ائتدیلر. باش کاتیب عؤمورعلییئوین ماجاریستانا سفری چرچیوه‌سین‌ده ماجاریستانین خاریجی ایشلر و خاریجی تیجارت باخانی پتر سیارتو و تشکیلاتین ماجاریستان آغ ساققالی آتیلا تیلکی ایله ده آیری آیری گؤروشدو. کوبانیچبک عؤمورعلییئو، تۆرک دؤولتلری تشکیلاتینین بوداپست اوفیسینه ده گئتدی.
تۆرکمنیستان‌دا ایکی قانادلی مجلیسین بیرلشدیریلمه‌سی گوند‌مده‌دیر. ۱۱ ژانویه تاریخین‌ده تورکمنیستان مجلیسینین اوست قانادی اولان خالق مصلحتی و آلت قانادی اولان تورکمنیستان میللی مجلیسی وکیللرینین بیرلشمیش توپلانتیسی ائدیلدی. تورکمنیستان خالق مصلحتی باشقانی قوربانقولو بردی‌محمدوو ییغینجاقدا مجلیسی بیرلشدیرمه تکلیفی وئردی. ۲۶ مارس ۲۰۲۳ تاریخین‌ده تورکمنیستان‌دا عمومی و یئرلی سئچیملر ائدیله‌جک.
قازاقیستان‌دا ۱۴ ژانویه تاریخین‌ده سنا اوچون سئچیملر ائدیلدی. قازاقیستان‌دا سناتورلاری یئرلی مجلیس عضولری سئچیر. قازاقیستان سناسینا سئچیله‌ن ۲۰ سناتور آلتی ایل وظیفه یئرینه یئتیره‌جک. قازاقیستان سیاسی سیستمین‌ده‌کی دییشمه‌لر و یئنیلنمه مدتی داوام ائدیر. قازاقیستان‌دا سون بیر ایلده آددیم آددیم نظربایئو عائله‌سینین توخونولمازلیغی قالدیریلدی و عائله‌نین تأثیری مینیموم سویه‌یه ائندیریلدی.
قیرقیزیستان‌دا ایسه اسکی جمهورباشقانی عسگر آغایئوه قارشی آچیلان دعوی دۆشورولدو.
اوکراینادا یاشایان قازاق دیاسپورو کیئو و بوچا شهرلرین‌ده گله‌نکسل تۆرک چادیری تیکه‌رک، احتیاجی اولان وطنداشلارا کؤمک ائتمه‌یه باشلادی. "مغلوب اولمازلیق چادیری" آدی وئریله‌ن گله‌نکسل قازاق چادیرین‌دا اینسانلارین تمل احتیاجلاری قارشیلانیر. روسیا خاریجی ایشلر باخانلیغینین بو مؤوضوع ایله ایلیگیلی تپکیسی اۆزرینه قازاقیستان خاریجی ایشلر باخانلیغی سؤز قونوسو گیریشیمده بیر غیر عادیلیک گؤرمه‌دیکلرینی آچیقلادی.
۱۱ ژانویه تاریخین‌ده باشقوردیستان جمهوریتینین ایلک جمهورباشقانی مرتضی رحیموو حیاتینی ایتیردی. باشقوردیستانی ۲۰ ایل یؤنه‌تن رحیموو ۱۹۹۰-جی ایللرین باشین‌دا اؤلکه‌سینین موستقیل اولماسی اوچون چابا صرف ائتمیشدی. راحیمووون جنازه مراسیمینه دؤولت باشقانی ولادیمیر پوتین ده قاتیلدی.
***
۹-۱۰ ژانویه تاریخلرین‌ده ۱۳.جو آسیا پارلامنترلر بیرلیگی عمومی قورولو آنتالیادا گئرچکلشدیریلدی. "دییشه‌ن اولوسلارآراسی دینامیک‌ده چوخ طرفلی‌لیگی تشویق ائتمه" باشلیغی آلتین‌دا گئرچکلشدیریلن ییغینجاغا ۲۷ اؤلکه‌دن پارلامنترلر قاتیلدی. ییغینجاقدا آوراسیا جغرافیاسین‌دان آذربایجان میللی مجلیسی باشقانی صاحبه غافارووا و تورکمنیستان میللی مجلیسی باشقانی گولشاد محمدووا ایشتیراک ائتدی. عمومی قورول سونون‌دا آنتالیا بیاننامه‌سی قبول ائدیلدی. آسیا پارلامنترلر بیرلیگی عمومی قورولو چرچیوه‌سین‌ده تورکیه، ایران و آذربایجان مجلیس باشقانلاری اوچلو ییغینجاق تشکیل ائتدیلر.
گلیشمه‌لردن گؤرولدوگو اوزره، قازاقیستان و تورکمنیستان جمهوریتلرینده سیاسی سیستمین دییشمه‌سی داوام ائدیر. تۆرک جمهوریتلرینده قارشیلیقلی سفرلر و امکداشلیغین گوجلندیریلمه‌سی ده داوام ائتمکده‌دیر.
ایلگیلی‌لی خبرلر
تۆرک جمهوریتلرینین گوندمیندهکی گلیشمه‌لر
حاضردا دونیانین ۱۵ اؤلکه‌سینده ۲۹ آذربایجان ائوی خیدمت ائتمکده‌دیر
