اورتا آسیا اؤلکه‌لری لیدئرلرینین موشاویره توپلانتیسی
قیرقیزیستانین چولپون آتا شهرینده اورتا آسیا جمهوریتلری جمهورباشقانلارینین ۴.جو موشاویره توپلانتیسی گئرچکلشدیریلدی
۲۱ جولای ۲۰۲۲ تاریخینده قیرقیزیستانین چولپون آتا شهرینده اورتا آسیا جمهوریتلری جمهورباشقانلارینین ۴.جو موشاویره توپلانتیسی گئرچکلشدیریلدی. توپلانتییا قازاقیستان، قیرقیزیستان، اؤزبکیستان، تاجیکیستان و تۆرکمنیستان جمهورباشقانلاری قاتیلدی.
قیرقیزیستان جمهورباشقانی سادیر جاپارووون ائو صاحیبلیگینده گئرچکلشدیریلن توپلانتیدا بؤلگه‌سل امکداشلیق، افغانیستان‌داکی وضعیت، ایکیلی ایلیشکی‌لرین گلیشدیریلمه‌سی کیمی مؤوضوعلار موذاکیره ائدیلدی. قیرقیزیستان جمهورباشقانی توپلانتیداکی دانیشماسیندا، بؤلگه‌سل بۆتونلشمه گیریشیملرینی دستکله‌دیکلرینی بیلدیردی.
ایسیق گؤل ساحلینده گئرچکلشدیریلن توپلانتیدا قازاقیستان جمهوریتی جمهورباشقانی قاسیم جومرت توکایئو بؤلگه‌سل اورتاق تی‌وی کانالینی قورما، سوسیال مئدیانی بؤلگه‌سل بۆتونلشمه اوچون ائتکیلی قوللانما تکلیفی ائتدی. اورتاق ویزیون، اورتاق آنلاییش، اورتاق سیاستلرین اولوشماسی باخیمیندان جمهورباشقانی توکایئوین اؤنریسی اؤنملیدیر. آیریجا قازاقیستان جمهورباشقانی چولپون آتادا مشهور قازاق آیدینی مختار آعوضووون هیکلینین آچیلیشینی ائتدی.
اؤزبکیستان جمهورباشقانی شؤوکت میرضیایئو، بؤلگه‌سل بۆتونلشمه آدینا ایندییه قدر ائدیله‌ن چالیشمالاری بیلدیردی و بؤلگه‌سل فوروملار، بؤلگه‌سل مدنیت، صنعت گونلری و دیگر فعالیتلری بئش اؤلکه‌نین اورتاق شکیلده گئرچکلشدیرمه‌سی لازیم اولدوغونو وورغولادی. جمهورباشقانی میرضیایئو، اقتصادی بۆتونلشمه اوچون اؤلکه‌لرین سرحد بؤلگه‌لرینده سربست تیجارت بؤلگه‌لرینین آرتیریلماسینین اؤنمینه دقت چکدی.
توپلانتیدا دانیشان تۆرکمنیستان جمهورباشقانی سردار بردی‌محمدوو، نقلیات ساحه‌سینده اورتاق چالیشمایا دعوت ائتدی. ایستر دوغو-باتی ایستر‌سه گونئی-قوزئی نقلیاتیندا اورتا آسیا جمهوریتلرینین اؤنمی گون گئچدیکجه آرتیر. بؤلگه‌نین هر بئش جمهوریتینین اؤنملی ترانزیت اؤلکه اولما پتانسیلی وار.
توپلانتی سونوندا لیدئرلر اورتاق بیلدیری ایمضالادیلار. قیرقیزیستان، قازاقیستان و اؤزبکیستان جمهورباشقانلاری، ۲۱.جی عصرده اورتا آسیانین قالخینماسی اوچون دوستلوق، یاخشی قونشولوق و امکداشلیق آندلاشماسینی ایمضالادی. تۆرکمنیستان ایله تاجیکیستانین جمهورباشقانلارینین، اؤلکه‌لرین‌ده‌کی ایچ اداری ایشلری تاماملادیقدان سونرا بو آندلاشمانی ایمضالایاجاقلاری بیلدیریلدی. آیریجا لیدئرلر بوتوپلانتیدا یاشیل گوند‌م بؤلگه‌سل پروگرامینی و ۲۰۲۲-۲۰۲۴ ایللرین‌ده بؤلگه‌سل امکداشلیغی گلیشدیرمه حاقیندا یول خریطه‌سینی قبول ائتدیلر.
تۆرکمنیستان ایله تاجیکیستانین بؤلگه‌سل بۆتونلشمه‌نی سرعتله‌ندیره‌جک آنلاشمانی ایمضالامانی ائرته‌‌له‌مه‌لری، سؤز قونوسو اؤلکه‌لرده اجتماعی گلیشیم، ایچ سیاست سۆره‌جلرینین قونشولاریندان بیر آز فرق‌لی سیر ائتمکده اولدوغوندان خبر وئریر. بو وضعیت بؤلگه‌سل بۆتونلشمه‌نی چتینلشدیره‌جک.
*
اورتا آسیا اؤلکه‌لری لیدئرلرینین ۴.جو موشاویره توپلانتیسیندا بؤلگه اقتصادینین وضعیتی ده موذاکیره ائدیلدی. روسیایا تطبیق اولونان تحریملر بؤلگه اقتصادینا تأثیر ائدیر. بؤلگه اؤلکه‌لری باتی و روسیا ایله ایلیشکیلرینده تعادل ساغلاماق و روسیا-باتی ساواشیندان اقتصادی ضرر گؤرمه‌مک اوچون چالیشیر. آیریجا بؤلگه اؤلکه‌لری باخیمیندان بو بحرانی فورصته چئویرمه ایمکانی دا سؤز قونوسودور.
قیرقیزیستان جمهورباشقانی جاپاروو آذربایجانین بیر سونراکی موشاویره توپلانتیسینا شرف قوناغی اولاراق قاتیلماق ایسته‌دیگینی بیلدیردی. بو گلیشمه، تۆرکوستان-قافقاز بؤلگه‌سل امکداشلیغین گلیشدیریلمه‌سی باخیمیندان سون درجه اؤنملیدیر.
اؤزتله، چولپون آتاداکی توپلانتیدا اورتا آسیادا بؤلگه‌سل بۆتونلشمه آدینا اؤنملی آددیملار آتیلدی. دونیا سیاستینده‌کی دییشیملر اورتا آسیا اؤلکه‌لرینی ده یاخین گله‌جک‌ده بؤلگه‌سل بۆتونلشمه باخیمیندان اؤنملی قرارلار آلماغا مجبور ائده‌بیلر.
