جمهورباشقانی اردوغانین تورکمنیستان سفری
اردوغانی، تورکمنیستان پرزیدنتی قوربانقولو بردی‌محمدوو عشق آباددا رسمی مراسیمله قارشیلادی
تورکیه جمهورباشقانی رجب طیب اردوغان ۲۷-۲۸ نوامبر ۲۰۲۱.جی ایل تاریخلرین‌ده تورکمنیستان‌دا سفرده اولموشدور. ۲۷ نوامبر تاریخینده اردوغانی، تورکمنیستان پرزیدنتی قوربانقولو بردی‌محمدوو عشق آباددا رسمی مراسیمله قارشیلادی. لیدئرلر ایکی‌لی و هئیتلری آراسی گؤروشلر گئچیردیلر.
دانیشیقلاردان سونرا ایکی اؤلکه آراسین‌دا سککیز آنلاشما امضالاندی. ساغلیق، تحصیل، مئدیا، حیوانچیلیق، بانکچیلیق و خاریجی ایلیشکی‌لر ساحه‌لرین‌ده ایمضالانان آنلاشمالار ایکی‌لی ایلیشکی‌لرین اینکیشافینا قاتقی وئره‌جک. بون‌دان علاوه، ایکی اؤلکه جمهورباشقانینین ایمضاسی ایله ۹ ماده‌دن عبارت اورتاق بیلدیری یاییملاندی.
داها سونرا مطبوعات کنفرانسی گئچیریلدی. مطبوعات توپلانتیسین‌دا لیدئرلر اورتاق تیجارت حجمینی ۵ میلیارد دلارا چاتدیرماغی هدفلدیکلرینی آچیقلادیلار. سون معلوماتلارا گؤره، ایکی اؤلکه‌نین اورتاق تیجارت حجمی ۲ میلیارد دولاییندادیر.
پرزیدنت رجب طیب اردوغانا تورکیه-تورکمنیستان امکداشلیغینین اینکیشافین‌داکی خیدمتلرینه گؤره دؤولت نشانی تقدیم ائدیلدی. ۲۰۱۷.جی ایلده اولوشدورولان یوخاری‌دا قید اولونان اوستون اؤدول داها اول ولادیمیر پوتینه وئریلمیشدی.
پرزیدنت اردوغان تورکمنیستانا سونونجو دفعه ۲۰۱۵.جی ایلده سفر ائدتمیشدی. تورکیه اوچون تورکمنیستان مرکزی آسیا و گونئی آسیایا آچیلان قاپی کیمی اؤنملیدیر. هر ایکی اؤلکه‌نین نقلیات ساحه‌سین‌ده ظرفیتیندن تام ایستیفاده ائدیلمه‌میشدیر. زنگه‌زور دهلیزی آچیلسا، ایکی اؤلکه آراسین‌دا قورو نقلیاتی مسافه‌سی داها دا قیسالاجاق. دوغو باتی اورتا دهلیزی و لاجورد دهلیز کیمی اولوسلارآراسی نقلیات شبکه‌لری تورکیه ایله تورکمنیستانی داها چوخ باغلایاجاق.
پرزیدنت بردی‌محمدوو سون ۱۰ گونده ایکی دفعه آذربایجانین اقتصاد باخانی میکاییل جاببارووو قبول ائتدی. گؤروشمه زامانی نقلیات و انرژی ساحه‌سین‌ده امکداشلیق مسئله‌لری مذاکیره اولوندوغو بیلدیریلدی. تورکمنیستان و آذربایجان خزر دنیزین‌ده‌کی «دوستلوق» انرژی یاتاغی پروبلئمینی دانیشیقلار یولو ایله حل ائتدی. تورکمنیستان طبیعی گازی گله‌جک‌ده تورکیه و باتییا صادر اولونابیلر. پلانلاشدیریلان آذربایجان-تورکیه-تورکمنیستان اوچلو ذیروه‌سین‌ده ایلیشکیلری یئنی سویه‌یه قالدیرماق اوچون قرارلار قبول ائدیله‌بیلر.
*
۲۸ نوامبر دا عشق آباد شهرینده «بیرلیکده گله‌جگه» قونوسون‌دا اقتصادی امکداشلیق تشکیلاتینین ۱۵.جی ذیروه توپلانتی‌سی گئچیریلدی. ذیروه‌ده آذربایجان، ایران، قازاقیستان، قیرقیزیستان، اؤزبکیستان، پاکیستان، تاجیکیستان، تورکیه و تورکمنیستان لیدئرلری ایشتیراک ائتدلر.
ذیروه‌ده جمهورباشقانی اردوغان تشکیلاتین دؤنم باشقانلیغینی تورکمنیستان پرزیئنتی بردی‌محمدووا تحویل وئردی. اردوغان ذیروه‌ده‌کی چیخیشین‌دا تورکوواک آشیسی اونایلاندیقدان سونرا اونو بوتون بشریتین خیدمتینه سوناجاقلارینی بیلدیردی. جمهورباشقانی، آیرجا افغانیستانا انسانی یاردیمین گؤندریلمه‌سینین واؤنملی اولدوغونو وورغولایاراق، تشکیلاتا عضو دؤولتلری قوزئی قیبریس تورک جمهوریتی ایله ایلیشکیلری گلیشدیرمه‌یه دعوت ائتدی.
ذیروه‌نین سونون‌دا عشق آباد فعالیت آنلاشماسی اؤلکه لیدئرلری طرفین‌دن تاونایلاندی. بیلیم و تکنولوژی، اقتصاد، اکینچیلیک و چئوره تاریخ، مدنیت، ادبیات و اینجه صنعت ساحه‌لرین‌ده اؤدوللر وئریلدی. ذیروه چرچیوه‌سین‌ده ایش فورومو دا تشکیل اولوندو.
اؤزتله، پرزیدنت اردوغانین تورکمنیستانا سفری وئریملی گئچدی.
